[dropcap]Н[/dropcap]оябрь зурул 24-нний МахIачкъалалив Къумукьнал театрдануву хьунни Оьруснал халкьуннал ва дагъусттаннал халкьуннал магьрал Республикалул V-мур фестиваль. Халкьуннал магьрал кьинилун хас дурсса байрандалий гьуртту хьунни республикалул шагьрурдая ва районнаясса 100-нния ливчусса коллективру. Жюрилул язи бувгьусса 10 хьхьичIунсса коллектив бусса сияхIравун бувххунни ЦIуссалакрал райондалул Гьамиящиял 1-мур школалул 2-мур классрал дуклаки оьрчIал постановка. Вайннан «За оригинальность театральной постановки» тIисса номинациялий диплом буллунни. Фестивальданий оьрчIал сивсуну ва магьирну ккаккан бунни цала гьунарду.
ОьрчIру барча бунни ДР-лул миллатирттал политикалул министрнал хъиривчу Гьарун Давыдовлул. Ванал кIицI лавгунни укунсса мероприятиярдайну дуклаки оьрчIан, дагъусттаннал ва оьруснал халкьуннал авадансса творчество лахьхьинсса сант ххишала шаврицIун, актершиврул гьунардугу лахьлахьишиву.
Миллатирттал политикалул министерствалучIасса Оьрус мазрал ва культуралул центрданул директор Лариса Кукановал бувсунни гьашину ва журалул фестиваль ххюлчин дуршиву ва шиву гьуртту хъанахъимигу ялу-ялун чIяву хъанай бушиву.
