Ларгсса нюжмардий МахIачкъалалив «Зунттаву къала» тIисса этнокафераву Дагъусттаннал турфирмардал пишакарталгу, тарихчиталгу, чирилул фондирттал, жяматийсса сакиншиннардал ва ДР-лул Муфтиятрал чулухасса вакилталгу гьурттусса батIаву хьунни. Сакиншинначитуращал хьунаакьин ва вайннал тIимуних вичIидишин увкIун ия ДР-лул туризмалул министр Расул Ибрагьимовгу.
БатIаврил мурад бия жулла республикалийн букIлакIисса хъамал, туристал кьамул буллалисса турфирмардал ца низамрай, тарихравун лавгми иширттая цакуцну буслан аьркиншиврия, гьарнал цанма дакIний ливчIмур букъаслай, ца кьарал дикIан аьркиншиву ххал дигьлагьисса. Гьаз бувна шикку турфирмардай зунсса экскурсоводтал хIадур буллан аьркиншивриясса масъалагу.
БатIаврил дайдихьулий сакиншинначитурал ккаккан дуруна цалла хIадур дурсса тарихран ва этнографиялун хас дурсса хъун дакъасса фильмгу. Ва вайннал ларсун дия уттигъанну УнцIукIуллал райондалийсса «АхIулго» мемориал комплексрай сакин бувну бивкIсса турфирмардал экскурсоводтурансса семинарданийн чул бивщуну. БатIаврий гьуртту хьун ва гидтурал чIявусса суаллахьхьун жавабру дулун оьвкуну бия тарихрал элмурдал доктор, аьлимчу ХIажи Мурад Доноголуйн. Семинарданиясса фильм ккаккан дурну махъ, ХIажи Мурад Доногол ихтилатраву кIицI бувна, гидтуращал хьусса семинардал хIасиллу дуллай, чара бакъа миннансса Дагъусттаннал тарихраясса лектория сакин бан багьлагьишиву.
«Экскурсоводтурал ттухьхьун буллалисса чIявусса букъавчIусса, лакъалавсъсса суаллу бия Ккавкказуллал дяъвилуцIун, Имам Шамиллул заманалуцIун бавхIусса. БучIия ва темагу гьарта-гьарзану дурчIин дансса, жула миллатирттал лаххи-ликкиялиясса, аьдатирттаясса ва жула буттал буттахъал багьу-бизулиясса лекциярду буклакисса, миннансса личIи-личIисса секцияртту сакин бан.
ДР-лул туризмалул министр Расул Ибрагьимовлулгу кIицI бувна, шиная шинайн Дагъусттаннай туризм лядуклай, хъамал ва туристалгу гьарза хъанай, цайми регионнай жуятува кIул хъанай, сий лахъ хъанай душивугу хIисавравун лавсун, укунсса журалул батIавуртту хъинну бучIи ляхълантIишиву вания тихуннайгу.
«На рязиссара шикку гьаз бувсса гьарца суалдания ва гъирарай гьуртту хьунна зу дуллалимунивух. Туризмалул министерствалул зузалт хIадурссар зуцIун бавкьуну ва зу дан дакIнийсса давурттавух гьуртту хьун ва республикалул каялувчитурахьгу бусан, баян бан»,-увкунни ванал.
БатIаврий мукунма махъру лавхъуна динчитурал ва жяматийсса сакиншиннардал вакилтуралгу.
