«Хъунна перемена» тIисса дуклаки оьрчIал дянивсса щалвагу Аьрасатнал конкурсрай ххув хьусса мукьа дагъусттан оьрчIава шама лак бия.
Дагъусттаннай кьини дарцIусса хьунни жуятура нанисса шинал ахир. Цурда шин захIматсса диркIнугу, чансса къавхьунни жува ххари бансса ишругу. Билаятрал даражалий, лахъа- хъунну кIицI ларгунни жула Виричу АхIмад-Хан Султаннул 100 шинал юбилей. Цал ттигу ххари бунну жува жула ХIабиб НурмахIаммадовлулгу.
Вай гьантрай тIурча, Дагъусттаннал цIа бюхттул дунни «Хъунна перемена» тIисса дуклаки оьрчIал дянивсса щалвагу Аьрасатнал конкурсрай ххувшаву ларсъсса дагъусттан оьрчIал. Вай оьрчIал ххувшавуртталгу тасттикь бунни Дагъусттаннай чувшивугу, гьунаргу, яхI- къириятгу ирсирай най душиву. Яла-яла ххарину бия жула лак. Конкурсрай ххув хьусса мукьа дагъусттан оьрчIава шама лак бия.
Хутиев Асх1аб, дуклай ур ЦIуссалакрал 1-мур школалул 11- мур классраву.
— Асх1аб школалий, дуккавривугу, жяматийсса давурттавугу, хьхьичIунну уссар. Ва гьарица шинах гьуртту шайссар личIи- личIисса конкурсирдай ва олимпиадарттай. Гьарица чулуха итххявхсса, гьармуния кIул хьун гъира бусса, жаваблувсса оьрчI уссар. Асх1аблул ххувшавриву ванан тарбия дуллусса нитти — буттал захIматрал бутIагу буссар. Жун хъунмасса пахру бур жула ученикнал, ва бюхттулсса ххувшаву ларсун, жула школалулгу, райондалулгу цIа гьаз даврия,- тIий бур Асх1аблул учительтал.
Шабанов Даниял, дуклай МахIачкъалалив унугу, ЦIуссалакрал райондалияссар. Вайннан призран ца- ца миллион арцул буллуну бур. Укуннасса призран лайкь хьуну ур Хъунзахъиял райондалийсса Гоцатуллал школалул 11- мур классрал дуклаки оьрчI МахIаммадов МахIаммадгу.
АхIмадова Багинат дуклай бур Къизлярдал 1- мур гимназиялул 10- мур классраву, цуппарив Ккуллал райондалиясса бур. Ванин призран дуллуну дур 200 азарда къуруш. Щалвагу билаятраясса ца миллиондалия ливчусса дуклаки оьрчIру гьуртту хьусса конкурсраву мукьа дагъусттанчу, миннавагу шама лаккучу ххув шаву, му хъунмасса, пахру бан бучIисса ишри. ЧIявуну баллан бикIай ттизаманнул жагьилтурай дакI къадакьлакьисса хъуниминнал ттуру-гъюру. Вай оьрчIаллив ккаккан бунни цайнна вихшала дишин бучIишиву. Щак бакъар вайннал ттиния тихунмайгу цаява баян баншиврий.
ОьрчIру жула бучIантIимурди учай. Укун ххаллилсса, итххявхсса оьрчIру бухьурча, жула бучIантIимур чаннасса бикIаншиврийн умуд хъунмасса бур.
