Дагъусттаннай «КIанттул сиптарду» тIисса проектрайну бакьин бантIий бур 27 райондалийсса 73 социал объектру ва инженер инфраструктурарду. Мунил хIакъираву цала Инстаграмрал страницалий бувсунни ДР-лул экономикалул ва территориярттал лябуккулул министр ХIажи Султановлул.
Мунал бувсмунийну, циняв субсидиярттал аьмсса лагру хьуну дур 181 млн ва 448 азарда къуруш. Субсидиярттаяр ххишала республикалул бюджетравату ми проектирдан меценатътурал личIи дурну дур 28,1 млн къуруш.
КIанттул сиптардал проектру бартдигьаврил мурад хъанахъиссар кIанттул цилакаялувшиврул органнацIун кабавкьуну агьамсса масъалартту дузал баву. Сиптачитурал чулухасса проектру дикIан аьркинссар жяматрансса инфраструктура лядуккан дувансса.
Проектрал давурттал каялувшин дуллалиссар ДР-лул Экономикалул ва территориярттал лябуккулул министерствалул. 2020 шинал Минэкономразвитиялул конкурсрай лич1и бувну, чирчуссар 27 кьутIи муниципал сакиншиннардал администрациярттащал республикалул бюджетравату субсидияртту итадакьаврил хIакъираву.
ХI. Аьдиловл
