Билаятрал Президент Владимир Путиннул «Хъуннасса перемена» тIисса щалвагу Аьрасатнал дуклаки оьрчIал конкурсрай гьуртту хъанахъиминнащал видеосвязьрал лагрулий ихтилат буллалисса ппурттуву барча унни та кьини 17 шин хьусса лаккуоьрчI, МахIачкъалаллал 28-мур школалий дуклакисса Даниял Шабанов.
Ва, музыкалул чулуха итххявхсса ушивруцIун, чичрулулгу гьунар бусса оьрчI ур. Данияллул шеърирду ва макьалартту дуркссар жул кказитрайгу, «ЧIимучIали» рубрикалул хъаттирдай.
Ялув кIицI ларгсса конкурсрал финал Къиримнавусса «Артек» тIисса оьрчIал центрданий хьунни. Финалданийн увккун ур щалвагу Аьрасатнавасса 1200 дуклаки оьрчI. Миннавух ур Даниял Шабановгу. Аьрасатнал Президентнал маслихIат бунни «Хъуннасса перемена» тIисса конкурс гьар шинах дуллан. «Жулва билаятрал политикалул ца гьанумур мурад – гьунар бусса жагьилтал ялун личин бувну, миннацIун кабакьу бувавур. «Хъуннасса перемена» конкурсрал кашигу, бюхъугу мукун кабакьинсса бур. Мунияту конкурс гьар шинах дуллан маслихIат ккаклай ура», – увкунни ванал.
Даниял Шабанов Инстаграмрайсса цала аккаунтрай чичлай ур конкурсрал полуфиналданий цIусса дустуращал кIул хьушиву, конкурсрал Аьрасатнал гьарцагу кIанттурдаясса дуклаки оьрчIру дус буллалишиву ва цанма чIявусса цIу-цIусса затру лавхьхьушиву. Барчаллагьрай ур цува барча увсса Аьрасатнал Президентнайнгу, оьрмулухун хъамакъаритансса бахшиш дурну тIий.
