ЦIусса КIулшивурттал центр

Дагъусттаннал паччахIлугърал техникалул университетраву тталаткьини хьунни жула билаятрайсса компаниярттал итадакьлакьисса продуктирдащал зунсса IT-пишакартурансса уттизаманнул центр тIитIлатIисса батIаву.


З. АьбдурахIманова
ТIитIаврил шадлугърай гьуртту хьунни ДР-лул информатизациялул ва связьрал министр Сергей Снегирев, ДГТУ-рал ректор НурмахIаммад Суракьатов, «РЕД СОФТ» компаниялул хъунаманал хъиривчу Рустам Рустамов, Республикалул медициналул информациялуха зузисса центрданул каялувчинал буржру чIумуйну биттур буллалисса Эдуард Мустапаев ва «Астрал-РД» ООО-рал каялувчи Руслан АхIмадов.


ХIукуматрал къуллугъирттай зузими ба­къассагу, центрданий кьамул буллантIиссар ишбажаранчиталгу, бизнес-компаниярттал вакилтал ва технологиярттал аралуву зун кьаст лархIусса студентъталгу.


БатIаврил сакиншинначитурал бусаврийну, махъсса шиннардий жула билаятрай импортозамещениялул политика щурущи давриха зий бухьувкун, хIукуматрал идарарттай жула билаятрай итадакьлакьисса IT-инфраструктура чялишну ишла давриха зий бу­сса бур. Масалдаран, ва гьашинусса шинал офисирттаву ишла дуллалисса жулла программардал щаллушинна лахъан аьркинну дусса дур 50 %. Информациялул технологиялул аралуву ца яла хьхьичIминнавухгу дусса дур Аьрасатнал «РЕД СОФТ» ООО компания. Ванил продуктирдал щаллу дайсса дур билаятрал 20 ведомство ва чIярусса укунмасса заллухъру бусса компанияртту.

Шиная шинайн ккаккан бувсса ишлашиндарал процентгу лахъ буллантIиссар. ХIукуматрал сайки циняр арардаву ишла дуллантIисса программарду жула билаятрай ххал диргьусса дикIантIиссар, миннуцIун ми мюхчан дувантIисса каширду ххи даврихагу зунтIиссар.
НурмахIаммад Суракьатов­лул батIаврий кIицI бунни центр тIитIаврищал шиккун кIулшивурттал хъирив бувкI­миннан ккаккан дантIишиву язи дугьансса шанна программа. Ми дикIантIиссар 24, 36 ва 48 ссятурдийсса. ХIукуматрал къуллугъирттай зузими бакъассагу, центрданий кьамул буллантIиссар ишбажаранчиталгу, бизнес-компаниярттал вакилтал ва технологиярттал аралуву зун кьаст лархIусса студентъталгу.

Сергей Снегиревлул кIицI лавгунни ва аралуву хъуннасса къулагъас билаятрал бакIчитурал чулуха импортозамещениялух ва му лядуккан даврил масъалар­ттах душиву.
— ХIакьину билаятрал каялувшиндарал унгу-унгусса къулагъас дуллай бур кIулшивуртту дулаврил аралуву информатизациялул мюхчаншиву ишла давриха. Къааьркинсса информация программардавун къаитххяхланшиврул хъуннасса ялув бацIаву дуллантIиссар. Жулла республикалийгу укунсса журалул давур­тту щуруй дуссар, вай дакъассагу, хIадур хъанай буру цаймигу ваниха лархьхьусса мероприятияртту щурущи дан, — увкунни министрнал.
Мероприятиялул агьаммур бутIа къуртал шайхту, цинявннал цачIу ятIул лентагу кьувкьуну, Центрданий дирхьунни цалчинмур дарс.