Ххуйсса ххуллурдугу буллай, ххуйсса къатригу буллай
Чансса бакъар лакраву чил кIанттай цала аькьлу-гьунарданийну, бюхъу-хIарачатрайну машгьургу хьуну, бусравну оьрму бутлатисса. Мукунминнавасса ур Гъумучиял агьулданиятусса, Тверь шагьрулий мина дирхьусса Аьрасатнал бусравсса строитель ва ххуллурдубуву Юнуслул арс АбрикI Валиев. Ванан гьашину сентябрь зуруй 70 шин хьуссар, юбилейращал барча уван, жугу ванал оьрмулул ххуллу- ххуттая бусанну.
М. Къаплановлул «Кази-кумух и его тухумы» тIисса луттиравасса информациялийн бувну, ва Валихъал Узун ХIажинал тухумраятусса ур. АбрекIлул ппу Юнус 1940 шинал кулпатращал Свердловскалийн ивзуну, аьрали заводрай къалайчину зий ивкIун ур. Нину Саидат АькIицIаххуйхъал тухумраятусса бур. Ватандалийн зана шайхту, ва Гъумук Сбербанкрал бухгалтерну зий бивкIун бур. Вайннал мукьа арс ва ца душ хъуни бувну бур. Душ Роза, АбрикIлул ца бакъа-бакъасса ссу, Хъанардал шяраватусса машгьурсса энергетик, техникалул элмурдал доктор, профессор Тамадаев Аьбдулхаликьлул кулпат бур. Роза цуппагу инженер-химикнал касмугу лархьхьуну цал Киеврай, яла Къазахъисттаннай ххуй- ххуйсса къуллугъирттай зий бивкIун бур. АбрикIлул шамагу уссу ларайсса кIулшивурттугу ларсун ххуй- ххуйсса давурттай зузисса бур .
ХIажи тIима уссу, аьпа биву, Таганрограй Радиотехникалул институт къуртал бувсса электронщик, шахталул куртIшивуртту ххал дигьайсса техникалулсса буллай ивкIун ур. Расул тIима уссу БАМ бувавривугу гьуртту хьусса инженер- строитель ур. Укун итххявхсса кулпатраву хъуна хьусса АбрикIлул ххуллурдаха зузисса минахурнал захIматрал оьрму байбивхьуну бур УзбакIисттаннай. Томск шагьрулий Инженер-строительтал хIадур бувайсса институт къуртал бувайхту, зун увтун ур УзбакIисттаннайн. Аьдат акъасса кIирисса кIанттурдай зун багьарчагу, жагьилсса прораб- дорожникнал даву шанна шинал лажиндарай лажин кIялану дурну дур.
Яла Калининнул областьрайн лавгуну ур. Тай диркIун дур билаятрал совет экономикалул иш ччех бикIлай, лащинсса даражалийн багьлагьисса арулцIалку шинну, амма Верхневолжьелив цIусса ххуллурду ва къатри буллай даву щириркIуну диркIун дур. АбрикI Валиевгу областьрал хъуни шагьраххуллурду бакьин буллалисса идаралий прорабру зун ивкIун ур. Ва идара ххуллурду ххуйну бакьин бувайшиврий цIаларгсса идара бивкIун бур. Ванал бюхъу-тяхъа, каялувчинал гьунар хIисав хьуну идаралул хъунаману ивтун ур. Яла «Калининавтодор» тIисса областьрал идаралул хъунаманал хъиривчуну ивтун ур. Ва аьмну Тверьдал областьрайсса ххуллурдалсса буллалисса идара бивкIун бур. Билаятрайн 1990-ку шиннардий захIматсса кьинирду дучIайхтугу, ва идаралул бюхъу- хъитлий зий Верхневолжьелул ххуллурду ххуйсса даражалия ялавай хьун къабивтссар, транспортрал инфраструктурагу ядурну. Ххуллурдал отраслилуву АбрикI Валиевлул цIа сийлий, хIурматрай диркIун дур. Амма ванал 2005 шинал ххуллурдал даву кьариртуну, къатри буллалисса «ТверьЖилДорСтрой» тIисса компаниялул хъунаманал даву бакIрайн ларсун дур. Сайки зувира шин дурну дур ва даврий зий. Тверьдал кказитирттай чичлай бур, ххаллилсса , къулайсса къатри буллалисса Валиевлул командалул хIарачатрайнур Тверьдай Европанал ца парча хьуссагу, тIий. Укунсса тIайлабацIулул хIакъиравурив АбрикI Валиев ур, даву ххирану, дуллалимуниву дакI дирхьуну зурча , чара бакъа ххуйсса хIасиллугу хьунтIиссар, инсантал цIусса къатравун бивзун, гьартасса, чаннасса, къулайсса къатрая рязийну миннал симанну чанна лархъун ккаклавунияр хъуннасса бахшиш цамур дакъассар тIий. Ва ялагу, ООО «ТверЖилДорСтройрал» вайксса шиннардил мутталий цалагу къатри буван чIал бувну инсантуран ссибизан бувну бакъар. Къуртал буван махъ буллусса чIумуй къуртал бувну, заллухъруннахьхьун чIумуй къатрал докуметру булайсса бур. Дур вайннал сияхIрай шагьрулул чIалачIин, майданну ххуй буллалисса проектругу. Масалдаран, бачIва- кIачIасса майданну, фонтаннугу дурну, щюллишиврувун бахьлаган бувну, ххуйсса газонну, тротуарду дурну, агьали бигьалаглансса паркру бувну бур. АбрикI Валиев дуллалимур инсантуран чIаланну, итталун агьанну дувайминнаватугу акъар. Мунияту чIявусса пишалул уртакьтуранмагу хавар къабикIан бюхъайссар ванал дуллалисса ихIсандалул давурттаяту. Ванал мудан кумаг бувайсса бур Аьрасатналмур «ЯтIул Ххачлин», чIявусса оьрчIру хъуни буллалисса кулпатирттал чIарав бацIайсса фондирттан. Чара бакъа гьуртту шайссар иширайнусса кумаг бувну ва АбрикI каялувшиву дуллалисса компания, Тверьдал Кьинилия тIайла хьуну, шагьрулий дуллалицири байраннай, спортрал мероприятиярттай. Мукунма Буттал кIанттул цIанийсса дяъвилул ветерантурал къатри бакьин бувайсса губернаторнал программалувугу чялишну гьуртту шайссар. Ва ур «Тверьдал строительтурал объединениялул» ассоциациялул коллегиялул ца яла хьхьичIунма членгу. Дур ванал чIярусса шиннардил мутталий дакIнийхтунусса захIматрайну лайкь дурсса тамансса бахшишругу. Амма, цава тIийкун, ванал хъунмур бахшиш дур – цIусса къатравун бивзминнал барчаллагьрал махъру. Ваная укун буслай бур даврил уртакьтал.
Владимир Шеин, Тверьдал областьрал Дорожно-строительная ассоциациялул президент: «АрулцIалку шиннардий областьрай шагьраххуллурду буллай, гьарза-гьарта буллай булувкьуну буссия. Нагу, АбрикI Юнусовичгу ми давурттал ветеранталлу. Тай ххуйсса чIунну дия, зунсса ресурсру диял къахъанай дия, амма зунсса гъира- шавкь хъуннасса дия. Жуяр хъунимигу жун хьхьичIва- хьхьичI лахьхьин буллай бия гьарца чулуха даврих куртIну ябитан, профессионалнайну зун. Тверьдал аьрщарай АбрикI Юнусович ххуллурду бай идаралий зий айивхьуссия мастерну, хъунаманал къуллугърайн лавхъссия яла. «Калининавтодор» идаралун шагьраххуллурдал строительствалулсса буллансса хъунама аьркин агьсса чIумал, ххаллилсса касмукар ва дакI тIайласса инсан хIисаврай, на мунал цIа дуллуссия, цIакьгу увну.
Ххуллурдал планнагу дузал дуван къахъанахъисса жул область шинал ахирданий билаятрай хьхьичIунминнавух шамилчинмур ххуттай хьуна. АбрикI Юнусовичлун тачIав кIилчин дакIнин рутан къабагьайва дуван аьркинмур, гьанттайннай гьим дуварча, кIюрххила зий улукьайва. Мудангу цала чулухунай хIурмат багьанну къуццу тIутIисса ия: давривугу, оьрмулувугу. Ванаяту чIявуссаннал эбрат ларсъссар, ванал хIарачатрал, гьунарданул пишалул уртакьталгу яхIливун багьан бувссар».
Сардар Аьбдуллаев, «Тверское объединение строителей» ассоциациялул президент: «АбрикI Валиевлущал на ччянива дусну ура, ва чув зурчагу, цува бюхъу бусса каялувчигу, хIакьсса зузалагу, дакI марцIсса инсангу ушиву ккаккан бувмари. Ва ххуллурду баврицIун дархIусса даврияту къатри буллалисса даврий зун лагайхту, ташвиш хъанахъиссагу бия, хьунавав ванаща къатри баврилмур давугу лахъсса даражалий дуван, ххуллурду баву личIири, къатралмур даву личIири тIий. Ванал ккаккан бунни цува гьарцагу чулуха итххявхсса ушиву. ХьхьичIва ххуйсса ххуллурду буллай ивкIхьурча, яла ххуйсса къатри буллан ивкIунни. ХIакьинусса кьининин жучIан ванал буллалисса къатрая аьрза бувансса ца инсан къаувккунни. Ялунгума, ванал бувсса къатраву квартирарду хъямала бувай. Ялагу кIицI лаган ччива, ва тIайламур ччисса инсан ушиву.
Цанмагу, даврингу заралнугу, тIайламур бакъа къаучай. МаслихIатгу дакIнийхтуну бувай. Халкьуннай дакIцIуцIаву дусса, архIал зузиминнаха аякьа дусса хъунама ур АбрикI Валиев».
Жунгу тIааьнну бур жула лаккучув Тверьдал агьулданул дянив укун бусраврай ва хIурматрай ушиву. ЦIуллушиву дулуннав уттиния тийнайгу лакрал цIа гьаз дуллан!
