Ларгсса алхIаткьини Къиримнаву, Симферополь шагьрулул дязаннив, Совет Союзрал кIийла Виричу АхIмад-Хан Султаннун цIусса гьайкал тIитIлатIисса шадлугъ хьунни. Шанна метралул лахъшиврийсса чарвитул скульптуралул автор ур Къиримнал художник- скульптор Айдар Аьлиев. Ва хъанай дур Виричунал чурххал къалип щаллуну абад буллалисса цалчинсса гьайкал, уттинин бюстру бакъа бакъассия. Гьайкал тIитIаврил шадлугърай гьуртту хьусса Къиримнал БакIчи Сергей Аксеновлул кIицI лавгунни АхIмад-Хан Султан Ватандалийн, миллатрайн дакI тIайлану къуллугъ баврил эбратну хъанахъишиву.
Шадлугърай гьуртту хьунни Дагъусттаннаясса делегациягу: МахIачкъалаллал мэрнал хъиривчу Запир Алхасов, Кировлул райондалул администрациялул БакIчи СалихI Сагидов, депутатътал-Шамил Аьлиев, Муслим Катаев. Дагъусттаннал делегация бивунни Виричу увсса ва хъуна хьусса Алупка шагьрулийнгу. Тикку, Виричунал бюстрачIа тIутIивгу дирхьуну, дагъусттанлувтал бивунни Виричунал цIанийсса музейравунгу.
— Жунма цинявннан кIулли АхIмад- Хан Султан, Лакрал, Дагъусттаннал ва Къиримнал агьалинал акъагу, щалвагу Аьрасатнал пахрулунсса летчик-испытатель ивкIшиву. На пахрулий ура Виричунал оьрму уттисса никиран чувшиврул ва яхI- къириятрал эбратну хъанай буну тIий, Къиримнал ва Дагъусттаннал жагьилтурангу, щалвагу Аьрасатнал билаятрал жагьилтурангу адаврал ва инсаншиврул дарсну хъанай буну тIий,- увкунни СалихI Сагидовлул.
Дагъусттаннал делегациялул Виричунал 100 шинал юбилейрал мероприятиярттай дурсса ххуйсса гьурттушинна кIивайвагу агьалинал дусшиврул ва хIала- гьурттушиврул арарду цIакь дуллалисса давурттуну хьуссар. 
