КъалалучIан – канатрай

Ларгсса тталат кьини Дагъусттаннал БакIчинал къуллугъ чIумуйну бартбигьлагьисса Сергей Меликов ивунни Дарбант шагьрулийн. Вагу, ванащалсса делегациягу хьунабавкьунни шагьрулул мэр Хизри Абакаровлущал.


Шагьрулул тарихийсса гьайкаллу ххал дуллай, шагьрулувух буклай бунува, Хизри Абакаровлул бувсунни шагьрулул оьрму, чIалачIин, архитектура ххуй дуван цуку-цукунсса давуртту дуллай буссарив. Туристътал кIункIу бувансса проектирттавух душиву бувсунни канатрал ххуллу баврил проектгу ва ттарлихIалу дакьин ва цIу ду­ккан дан най бушиву.
Меликов ивунни цIанихсса Нарын-Къалалийн. Бувсунни ванахь кIиккугу машинартту бацIан бансса парковкалуха зий бушиву, инсантал къалалучIан электромобиллай ххилантIишиву, цаймигу къулайшиннардаха зий бушиву.

Меликов ивунни Дарбантуллал цIусса «Арбатран» ккаллий­сса Казем- Беклул кIичIиравунгу, шагьрулул поликлиникалийнгу, 15-мур школалийнгу. Ванал бувсунни цува Дарбантлив дуллалисса давурттая рязину ливчIшиву, хаснува щалва шагьру ххуй бувансса мастер- пландалий дакI даркьушиву.

ХIадур бувссар
П. Рамазановал