Октябрь зурул 25-27-нний Москавуллал чIаравсса Видное тIисса шагьрулий хьунни хIала-ккаласса данди буккавурттал спортрал Аьрасатнал чемпионат. Мунил сакиншинначиталну бия Щалвагу Аьрасатнал миксфайт спортрал федерация. Билаятрай коронавирусрацIун дархIусса нигьачIисса тагьар хIасул шаврийн бувну, спортсментал лачIун буклакисса зал тамашачитал бакъа бачIва бия.
Миксфайт спортрал турнирданий гьуртту хьунни Аьрасатнавасса ва цаймигу хIукуматирттаясса 200-хъул спортсментал. Чемпионатрай гьуртту хьунни Дагъусттаннал паччахIлугърал медициналул университетрал 1-мур курсирай дуклакисса ЦIуссалакрал райондалиясса Баграуттин Рамазанов. Баграуттиннул вай бяст-ччаллай бувгьунни 2-мур кIану. Баграуттин хIадур увну ур цIанихсса тренер Бадави ХIасановлул.
Миксфайт – му бокс, самбо, дзюдо, кикбоксинг, тайский бокс, каруннай бияву ва цаймигу данди буккавуртту хIала дурхсса спортрал ца журар. Жагьилтурал дянив ва спортрал жура сийлий бур ва анаварсса мутталий машгьур хъанай най бур.
