Мурчайн къаршину бацIан къавхьунни

[dropcap]М[/dropcap]ахIачкъалалив ва цаппара гьантрал дянив бивщусса гуж­сса мурчал чIалачIи бунни хасъсса компанияртту хIадурну дакъашиву мукунсса иширттайн къаршину бацIан — мурчал лиян дурмур чIумуй дакьин дан, чаннал ва щинал масъалартту ччясса чIумуй дузал бан.


[dropcap]М[/dropcap]у кIантту кIицI лавгунни шагьрулул бакIчи Салман Дадаевлулгу, октябрь зурул 12-нний администрациялий хьусса оператив совещаниялий.
-Гьарца иширал хIакъираву хъирив лаян аьркинну бур. Мугьлат бакъа кIантту-кIанттурдайн бивну, тагьар ххал дурну, давуртту чялиш дуккан дунни депутатътурал. Мунияту бювхъунни, шагьрулул личIи-личIисса кIанттурдай хьусса токрал сетирдал аварияртталсса бувну, агьалинан чани бан. Ци чулийгу, вай давуртту аьркинсса куццуй, анаварсса бущилий най дакъая.
ЦIунилгу энергетиктал хIа­дурну къалявкъунни укун­сса иширттайн, хIатта жу хьхьичI­вагу цимилагу укунсса шартIирдай цачIу цукун зун­ссари ххал бивгьуну бивкIнугу, — увкунни шагьрулул мэрнал. Ванал бувсунни шагьрулул админист­рациялул ялун лирчусса диялдакъашивурттал хIакъираву чаран лякъинтIишиву.

— Энергетикалул комплексрал каялувчитал ччя-ччяни баххана хъанай бур. Миннащалсса укун­сса иширттал хIакъиравусса даву цIунилла-цIунил дайдишин багьай. ЧIярумур чIумал му дуллан багьай МЧС-рал леххаву дуркIукун. Компаниярттал жу тIутIимуних къулагъас къадурсса кIанттурдугу шай. Мунияту, жун багьлай бур агьалинал ихтиярду ва мурадру буруччаврил цIаний закондалул ххуллий сукку тIун. Гьарица шанма гьантлуяр ххишалану агьали чани бакъа ливчIсса иширттал хIакъираву прокуратуралийн буклан. На тапшур бав депутатътурайн хасъсса компаниярттал вакилтуращал хьунабакьин, миннал цала даву аьркинсса даражалий къадуллалаврил багьана-сававртту кIул дан. Вай масъаларттаву жунма кабакьу бантIиссар ОНФ-лулгу (Общероссийский народный фронт), — увкунни Салман Дадаевлул.
Ихтилатру бунни депутатътурал, ЖКХ-лул управлениялул ва шагьрулул цасса диспетчертурал къуллугърал каялувчитурал. Цасса дежурнайтурал ва диспетчертурал къуллугърал директор Тельман Сулаймановлул бусласимунийн бувну, укунсса авариярттал лирмур мугьлат бакъа дазин хъанай дакъар, вай компаниярттал складирттай аьркин­сса запчастьру, оборудование да­къашиврийн бувну.

[dropcap]С[/dropcap]овещаниялий гьаз бунни мукунма управляющий компаниярттал ва застройщиктурал жаваблувшиндарал масъалагу. Вайннал биялдарайсса къатравату мурчал лавсун бур пюрунтру ва ялтту даркьусса затру, инсантурал цIуллу-сагъшиврун нигьачIаву хьуну дур.
Укунсса цинявппагу иширттал хIакъираву жавабрайн буцин тапшур бунни шагьрулул бакIчинал. Ванал бувчIин бунни, хьун бумур хьуну махъ сукку къатIий, стихиялул хIакъираву баян байхтува, хIадур хъанан аьркиншиву. ХIадурну бикIан аьркиншиву зузалт ва техника.

ХIадур бувссар
Андриана Аьбдуллаевал