Каспийскаллал агьулданун, хаснува лакран, ххуйну кIулссар чIярусса шиннардий ва шагьрулий ялапар хъанахъисса Абачараевхъал кулпат. Аьлимтурал кулпат учай вайннайн, нину-ппугу, оьрчIругу элмулул ва кIулшивурттал ххуллий хьхьичIунмай лавгсса бунутIий. Ххюлуссуннал шяравасса Мусал ва Ккурклиясса Мисайл 56 шин дур цачIу оьрму бутлай. Вайннал бур шанма оьрчI: ца арс ва кIива душ. Кулпатравусса цинявнная личIи- личIину бусан лайкьри.
Амма уттигъанну кIицI ларгсса оьрмулул юбилейрацIун ва учительнал байрандалуцIун бавхIуну, ттун бусан ччива цила оьрмулул хъунмур бутIа оьрчIру тарбия баврин ва миннан кIулшивуртту дулаврин хас бувсса ххаллилсса педагог ва тарбиячи Мисай Аьбдурашидовная.
Андриана Аьбдуллаева
Бувну бур Мисай 1940-ку шинал Ккурккуллал шяраву. Ва чIивисса чIумал нину-ппу Туркманнавун бивзун, Мисайл оьрчIшиву тийх ларгун дур. Арулва класс ванил бувккуну бур Керки тIисса Туркманнал шагьрулий. Мунияр махъ шяравун зана хьуну, Ккурклив школагу къуртал бувну, бувххун бур Дагъусттаннал университетрал чил билаятирттал мазурдил факультетрайн. Ванил захIматрал ххуллу байбивхьуну бур Каспийскаллал 8-мур школалия. 45 шин дурну дур Мисайл ва школалий ингилис мазрал дарсру дихьлай.
— Ванил чIалачIинна, зана-кьулушинна учительнал дур. ТIул — тIабиаьт уздансса, махъ — ихтилат нахIу-хIалимсса, мяърипатрайсса, цила бикIайкунсса интеллигент бур,- тIун бикIай ва кIулми циняв. Вай хасиятругу ванин ниттия дирсса духьунссар тIий бура.
Ттун ххуйну дакIний дур ванил нину УммухIабибат. Ттул хъунна бавал дусгу, чIаххувщаргу дия. Уздансса, хIал бавкьусса хъамитайпа бикIайва. ТачIав лахъсса чIуний ихтилат къабайва, щиякIуй бурушин къабайва. КIива махъ бакъасса инсан бия. Мукунмасса бур ванил душру Мисай ва Майсаратгу.
Сайки 50 шинай учительну зий, Мисайл кIулшивуртту дуллуну дур цикссагу оьрчIан.
ВаничIа дуклакисса оьрчIал чIявуну хьхьичIунсса кIанттурду бугьайва республикалул олимпиадарттай ва конкурсирдай. Мисай Аьбдурашидовна хIурматрай бия архIал зузиминначIа, ххирая дуклаки оьрчIан. Цила даву ххуйну кIулсса, оьрчIащал маз лякъин кIулсса учительница бия. ЦIанагу хьунабакьай Мисай Аьбдурашидовна ттул яла ххирамур учительницая тIисса цикссагу выпускниктал.
Бур вайннаву, цала учительница ххуй бизлай, ингилис мазрал учительнал пиша язи бувгьуссагу. Ххира хьун кунмасса буссар ва цуппагу. Аьчухсса, цаманал дакIниймур лаласун кIулсса. ОьрчIру тарбия баврил, миннан кIулшивуртту дулаврил ххуллий бивхьусса захIматрахлу Мисай Аьбдурашидовна лайкь хьуну бур личIи -личIисса наградарттан. Ва бур халкьуннал кIулшивуртту дулаврил отличник.
Цила ласнащал, техникалул элмурдал доктор, профессор Муса Абачараевлущал архIал ванил цалами оьрчIангу ххуйсса тарбиягу дуллуну, кIулшивурттахсса гъирагу бувтун бур. Арс Ибрагьин буттал шаттирдайх лавгун ур. Вагу техникалул элмурдал докторди, профессорди. Хъунмур душ Анжелика зий буссар Каспийскалийсса Машиностроениялул ва сервисрал техникумраву. Ва экономикалул элмурдал кандидатри.
ЧIивимур душ Мадина дарс дихьлай бур Каспийскалийсса Энергетикалул колледжраву. Ва филологиялул элмурдал кандидатри. Вайнналми оьрчIал язи дургьуну дур медицина. Анжеликал душ, Дагъусттаннал медициналул университетрал стоматологиялул факультетгу къуртал бувну, Москавлив зий бур, цуппа заллусса стоматологиялул клиника тIивтIуну. Ибрагьиннул душгу ккарччал хIакин бур. Зий бур МахIачкъалаллал стоматологиялул поликлиникалий. Мадиналмур душгу Дагъусттаннал медициналул университетраву дуклай бур. Дуккавриву, давриву итххявхсса бушивруцIун, Мисай цуппагу, ванил оьрчIругу буттал кIанугу, цала миллатгу ххирасса хIакьсса патриотътал бур. Циняв ичIува, хъунамагу, чIивимагу, лакку мазрайри гъалгъа тIий бусса. ЦукунчIав руцан къаритайссар шяраваллищалсса дахIавугу. Жяматрангу вай бусравну бур. Чув бухьурчагу, цIуллуну битаннав.
