Ларгсса нюжмардий, Учительнал кьини, Республикалул БакIчи Владимир Васильев Дусшиврул къатраву хьунааавкьунни Дагъусттаннал хьхьичIунсса учительтуращал ва миннан ларайсса наградартту дуллунни.

П. Рамазанова
[dropcap]В[/dropcap]анал, учительтурал даврин лахъсса кьимат бишлай , чIурчIав дунни, сайки гьарца кьини тIиссакссагу, ссавур ду­къарну чара бакъасса, оьрчIахгу ччаву аьркинсса даву душиву. Республикалий чIявуми учительтал мукунсса бушиву ва дакIнихтуну зийгу бушиву. Бувсунни личIиссава барчаллагьран лайкь хьушиву учительтал пандемиялул ппурттуву дистанциялул кьяйдалий дарсру дихьлахьисса чIумал. ЦIусса, къабигьасса журалий зун багьсса учительтал оьрчIан цIакьсса ва куртIсса кIулшивуртту дулунсса хIарачатрай бивкIшиву. Учительтурахь барчаллагь учин Республикалул хъунаманащал Дусшиврул къатравун бувкIун бия премьер-министр Артём Здунов, кIулшиву дулаврил ва элмулул министр Уммупазил Оьмарова ва цаймигу хъуни къуллугъчитал. «Земский учитель» программалуву гьуртту хъанахъисса учительтуралгу , хьхьичIунсса учительтуралгу республикалул хъуниминнащалсса кунма ихтилатру кIулшиву дулаврил даву лаваайсса даражалийн гьаз дуван­сса чаранну ккаклакисса бия. Наградартту дуллусса учительтуравух бия Аьрасатнаву машгьурсса чичу, публицист, Да­гъусттаннал кIулшиву магьир даврил институтрал проректор Миясат Муслимовагу.