[dropcap]В[/dropcap]ай гьантрай Ккурккуллал шяраваллил библиотекалуву хьунни Хъунмасса Буттал кIанттул цIанийсса дяъвилул гьурттучи, тарихрал элмурдал доктор, профессор МахIаммад Буттаев дакIнийн утлатисса вечер. Ванил сакиншинначитал хьунни шяраваллил библиотекалул хъунмур Сияли Аьбдуллаева ва Культуралул къатлул художествалул каялувчи Аймисай Аьбдуллаева.
А. Аьбдуллаева
Шикку гьуртту хьунни Ккурккуллал школалул учительтал ва дуклаки оьрчIру, шяраваллил жяматрал вакилтал. Библиотекалий тIиртIуну дия МахIаммад Буттаевлул луттирдал выставка.
Дачин дурну бия мероприятие Сияли Аьбдуллаева. Ванил бувсунни МахIаммад Буттаевлул оьрмулул ва творчествалул ххуллу-ххуттая.
Дуклаки оьрчIал бувккунни ва ккаккан бунни ванал произведениярттавасса парчри. Цинявннан ляличIинува асар хьунни «Фронтраясса шанмурцIу чагъарду».
МахIаммад Буттаев дакIнийн утлатисса ихтилатру бунни учительтурал ва жяматрал вакилтурал.
