Виричув дакIнийну

[dropcap]О[/dropcap]ктябрь зурул 5-нний ЦIуссалакрал райондалий хIурматрай хьунабавкьунни Липецкалиясса хъамал – 1999 шинал сентябрь зуруйсса дяъвилул иширттаву къучагъшиврий жан дуллусса Аьрасатнал Виричу Андрей Тепериклул нину-ппу ва гъан-маччами.


ХьхьичI кьини бусравсса хъамал хьунабакьин делегациялущал цува лавгунни вокзалданийн райондалул бакIчи МахIаммад-ХIажи Айдиев.
Вирттаврал гьайкаллацI тIутIив дирхьуну махъ, райондалул хъунаманал бувсунни 1999 шинал сентябрь зуруй ЦIуссалакрал райондалий най бивкIсса дяъвилул иширттая, къучагъну талай бивкIсса кIанттул милицанал ва Липецкаллал ОМОН-лул зузалтрая, вайннавух ивкIсса Андрей Тепериклул чувшиврия.

Та кьини, 1999 шинал сентябрь зурул 5-нний, ЦIуссалакрал шяравусса РОВД-лул къатрайн ххявхссар ярагъуннил балгу­сса боевиктал. Миннайн данди бавцIуссар РОВД-лул зузалт ва Липецкаллал ОМОН-лул аьра­литал. Постру ххал буллай ялтту буклакисса взводрал командир, милицанал лейтенант Алексей Токарев ва отрядрал хIакин, виваллил къуллугърал хъунама лейтенант Эдуард Белан тIайла бавцIуссар боевиктурал луркIандалийн. Миннал мугьлат бакъа баян бувссар отрядран. Ва ишираву Токаревлуйн захIматсса щавурду дир­ссар, Белан боевиктурахьхьун иривну, миннал ивкIуссар.

Боевиктурал личлачисса гранатарттал милицалт ва аьралитал бусса спортзалданул чIирай вярчIу бувтссар.
Му чIумал, Андрей Теперик гьаз хьуну, боевиктурайн цIу тIиртIуссар. Му лахIза ишла бувну аьралитураща спортзалданува буккан бювхъуссар. Амма снайпернал ккуллалул увтссар Андрей цува.

Андрей Тепериклун диркI­ссар дахьра 27 шин. Ванал къучагъшиву абадлий дакIний дикIантIиссар ЦIуссалакрал агьулданун.
Виричу дакIнийн утлатисса мероприятиярттай гьуртту хьунни райондалул администрациялул вакилтал, райондалул шяраваллал бакIчитал ва идарарттал каялувчитал. Вайннал цинявннал дакIнихтунусса барчаллагь увкунни къучагъсса арс тарбия увсса нитти-буттахь ва гъан-маччанахь.