Ларгсса арвахIкьини ДР-лул Халкьуннал Мажлисрал залдануву Дагъусттаннал бакIчинал буржру чIумуйну биттур буллантIисса Сергей Меликов парламентран ва ХIукуматран гъанну кIул уллалисса мажлис хьунни. ЦIусса хъунама кIул унни СКФО-лийсса Аьрасатнал Президентнал вакил Юрий Чайкал хъиривчу Сергей Стариковлул. «Тавакъюри Халкьуннал Мажлисрал депутатътурахь Сергей Меликовлул чул бугьаву, политикалуцIун бавхIусса личIи-личIисса пикрирду бухьурчагу, ванал лагма лагаву»,-тIисса Чайкал цIанихсса барча аву дурккуна Сергей Стариковлул.
[dropcap]С[/dropcap]ергей Меликовлулгу кIицI лавгунни цайнма Дагъусттаннал хъунамашиву дуллан тапшур буваву му цува буржлув уллалисса давуну душиву ва агьалиналгу, Аьрасатнал хъуниминналгу цайнна дурсса вихшала хIалал дуванмур буллантIишиву.
— Дагъусттан-авадансса тарихгу, ляличIисса культурагу, аьдатругу дусса ххаллилсса билаятри,-увкунни Меликовлул ва чIурчIав дунни Дагъусттан цанма ятсса бакъашиврий.
ДакIнийн бутанну ларгсса итникьини Аьрасатнал Президент Владимир Путиннул кьамул бувшиву Дагъусттаннал БакIчи Владимир Васильевлул цува хушрай Дагъусттаннал БакIчинал къуллугърая укьлакьаврил аьрза ва му Путиннул цIакь увшиву цала советникну.
Видеоконференциялул кьяйдалий буллалисса ихтилатраву Путиннул барчаллагь кунни Васильевлухь Дагъусттаннай хъуни-хъунисса хъин чулийннайсса дахханашивуртту дуваврихлу. Сергей Меликовлулгу бувсунни цала давриву хьхьичIххуттайн ласунтIишиву коронавирусрал азарданущалсса талатаву, экономика ва агьалинащалсса дахIаву.
ХIадур бувссар П.Рамазановал
