«НякI лелуххул» хъирив – Дагъусттаннайн

Октябрьданул 15-нний жулла республикалийн, Тюлений т1исса жазиралийн, бувкIунни цIа дурксса «Моя Планета» тIисса телеканалданул журналистътал, «Кавказский пленник. Дагестан: в поисках синей птицы» тIисса цIанилусса документал телепроект иширайну щаллу даву мурадрай.


Бадрижамал Аьлиева
Шикку дакIнийн бутан, «Синяя птица» – му Бельгиянал драматург ва философ Морис Метерлинклул пьесар. Мунилмур кунна, утти Дагъусттаннай ласун нанимур фильмралмур сюжетгу дур инсан абадул-абадлийсса талихIрал лишандалух луглагаврил лагма щурущи дурсса.
ЦIа дурксса телеканалданул муниярдагу цIа дурксса журналист Андрей Панкратов цува рязину «ккавкказуллал ясирну» най ур, зунттал билаятрал ххуйшивурттая­сса ва хIикматирттаясса гьарта-гьарзасса видео-путеводитель сакин баншиврул.

Киносурат ласласисса творчествалул группалул жулла республикалий ххюва гьантта бувантIиссар, му хIаллай журналистътал биянтIиссар Бущихъиял ахъулссаннул-консерварттал заводрайн, мусил ва муххал ус­ттартурал дязаннун ккаллисса Оьргърал шяравун, аьвзалзаманнул шагьрулийн Дарбантлив, Дагъусттаннал Огни шагьрулийсса пагьламантурал школалийн ва ккавкказуллал ятти­ккаччив ябуллалисса Первомайскаллал шяравун. Муниннин хьхьичI тIурча, республикалул хъамал биянтIиссар Тюлений жазиралийн.
Проектрал продюсер Райхан Ливаднойл мукъурттийн бувну, хасну Тюлений жазира язи бувгьуну бур му биян захIматсса кIану буну тIий. Миккун бияншиврул хьхьирийх чанна-чанну 40 километра ритан багьлай бур.

Жазиралий кино ласласисса группалул дуван аьркинми давурттал ахирну хьунтIиссар микку телепроектрал ттугъ бищаву, заповедникран ккаллисса жазира ябуллалисса инсантуращалсса, метеорологтуращалсса Владимир Амировлущалсса ва Станислав Веньягуевлущалсса – хьунабакьавурттайну. Къизлардал райондалийми телепроектрал лагрулийсса давуртту щаллу хьунтIиссар райондалул каялувшиндарал кабакьаврийну.
«Кавказский пленник. Дагестан: в поисках синей птицы» тIисса фильм ккаккан дувантIиссар ноябрьданул ахирданий.