Ларгсса хамискьини, сентябрь зурул 24-нний, Россия-1 каналданий ккаккан дунни «ХIасан Камалов- Капитан Руссо» тIисса документал журалул киносурат. Ва дия Италиянал Виричу ХIасан Камаловлуятусса телефильмрал премьера. Мяйжанссар, 1973 шинал Ухссавнил Ккавкказуллал кинохроникалул студиялулгу ( режиссер П. Финкельберг) ккаккан дурссия «Капитано Руссо» тIисса, киноочерк хIисаврайсса, 17 минутIрайсса фильм.
Уттимур телефильм 45 минутIрайсса дия. Ванил авторгу ур Дагъусттаннал агьалинан ххуйну кIулсса тележурналист, ГТРК «Дагестан» каналданул гендиректорнал хъиривчу , ТОКС-рал штабрал хъунама Ссалам Хавчаев.
ПатIимат Рамазанова
[dropcap]Н[/dropcap]айбунува кIицI лагангу ччай бур, краеведтурал- следопытътурал телевидениялул кьюкьлущал Ссалам Хавчаевлул фронтовиктурал аьпа уттавану ябувавриву хъунмасса бутIа бивхьушиву.
Дагъусттаннал цIанихсса арснал ХIасан Камаловлуятусса телесуратгу щалвагу миллатрал бусрав- барчаллагьрай кьамул дувантIисса давуну дур. Укуна тIий ур Виричунал уссил арс, аслансса буттауссил гьайкал Читтурав дацIан дурсса, гьалмахтуращал мунал гьаттайн иян Италиянавунгу лавгсса ХIасан- ХIусайн Камаловгу.
— Ссалам Хавчаевлул ттул буттауссил 100 шинал юбилейрайн ххуйсса бахшиш дунни, Виричунал оьрмулия гьарза- гьартану бусласисса , ялун нанисса никиран асар хьунсса ва тарбиялул дарсну хьунсса даражалийсса телефильм дунни. На хъунмасса барчаллагь тIий ура ванахьгу, ванал лагма лавгун телефильмраха зий бивкIминнахьгу, — тIий ур ХIасан-ХIусайн.
