АхIмад-Хан Султаннул юбилей дуллалиссар ЦIувкIравгу, Ваччавгу

Октябрь зурул 25-нний (кув документирттай 20-нний тIий бур) 100 шин хьунтIиссар Совет Союзрал кIийла Виричунан, СССР- данул лайкь хьусса лётчик-испытательнан, ПаччахIлугърал премиялул лауреат АхIмад-Хан Султаннун. Ва юбилей лайкьсса даражалий хьунадакьин хIадур хъанай бур Ккуллал райондалийгу. Октябрь зурул 17-нний юбилейрал шадлугъру дикIантIий дур Виричунал буттал шяраву, 1-мур ЦIувкIравгу, райцентрданий Ваччавгу. Вава октябрь зурул 25-нний юбилейрацIун дархIусса мероприятияртту МахIачкъалаливгу дуван хIадур хъанай бур, ЦIувкIуллал активрал, Каспийск шагьрулул № 7 лицей уртакьну, «Россия- моя история» тIисса тарихрал паркраву Виричунан хас дурсса выставка ва цаймигу мероприятияртту дувант1иссар.


ПатIимат Рамазанова
Ларгсса нюжмаркьини ЦIув­кIуллал Жяматийсса советрал члентал бавтIуна юбилейрайнсса хIадуршиндарая бусан.Ккуллал райондалул хъунаманал хъиривчу Давдиев Анатолийгу увкIун ия. Микку ихтилат бия дуллалисса ва дувантIисса давурттая — шяравусса ва шагьрулийсса Виричунал гьайкаллу, субботникру дурну, дакьин дуваврия, юбилей Виричувнал цIанин лайкьну тIайла дуккан­сса хIарачат буван аьркиншиврия.

Октябрь зурул 17-нний юбилейрал шадлугъ дайдишинтIий дур ЦIувкIравсса гьайкалдануц1 кIюрххил ссят урчIунний тIутIив дишаврийну. Яла Виричу дакIнийн утан батIинтIий бур Ваччавмур гьайкалданучIан, Ваччав дикIантIий дур спортрал соревнованияртту ва культуралул программа.

ЦIувкIуллал Жяматийсса советрал баян буллай бур ЦIувкIрав юбилейрайн наними октябрьданул 17-нний, ххуллункьини, кIюрххил ссят ряххунний АхIмад- Хан Султаннул гьайкалданучIату бачинтIишиву.

Читайте также: