Дагъусттаннал Транспортрал ва ххуллурдал хозяйствалул министерствалий ххал бивгьунни коронавирусрал инфекциялул ппурттуву пассажиртал ххилаххаврил масъала. Министр Ширухан ХIажимурадовлул бувсунни, цIуницIа азар гужну ппив къахьуншиврул, чара бакъа пассажиртал транспортрай маскарду лаххан буллан багьлай бушиву.
Ванал бувсунни цал пассажиртурал дянив маскарду лаххан аьркиншиву бувчIин буллалисса даву гужлан дувантIишиву, маскарду дакъа къабучIиссар тIисса чичру дусса наклейкарду, вывескарду лачIун дуллантIишиву, ва давривух ГИБДД-лул зузалтгу хIала буххантIишиву.
ГИБДД-лул Управлениялул хъунама Александр Шалагиннулгу мяйжан бунни цалсса пассажиртуран бувчIин буллантIишиву маскарду дакъа маршруткардавун, автобусирттавун, троллейбусирттавун буххан къабучIишиву. Яла маскарду дакъа буххан къабитансса кьянкьасса къадагъа дикIантIишиву.
П. Рамазанова
