Гьашину, гъилисса гъинтнил гьантрай, Кьукуннал жагьилтал цачIун хьуну, Хъунмасса Буттал кIанттул цIанийсса дяъвилий ххув хьуну 75- шин шаврин хас дурну, «Кьукни – МахIачкъала» тIисса велосипедирттайсса бигьаву (велопробег) дунни.
Августрал 2-нний, кIюрххил ссят ххюнний бивзун, Буттал кIанттул цIанийсса дяъвилий жанну харж дурсса Кьукуннал виртталгу дакIнийн бивчуну, миннал аьпалун дацIан дурсса Мемориал-комплексрачIа алхIангу бувккуну, ацIа жагьил, Кьукнияту бувккун, ахттакьунмай, ссят ряхра шавайсса чIумал бивну бур МахIачкъалалийн.
Ттуршлий ххюцIа-ряхцIалла километрагу риртун ххуллийх ци ккавкри куну цIувххукун, личIисса захIмат къавхьушиву ва кувннал кув бувгьуну, аьркиннан ка-кумаг буллай бивкIшиву бувсунни.
Жува ттизаманнул жагьилтурай аьйрду ришлан анавар буклан бикIару. Амма вай жагьилтурал ккаккан бунни цанма Буттал кIанттугу ххирашиву, Буттал кIанттул цIаний дяъвилий талай бивкIмигу, жанну харж дурмигу хъамакъабивтшиву, миннаяту пахругу бушиву.
Вания тихунмайгу жагьилтурал пикри бур ва даву гьарца шинах дайсса аьдатравун дутансса.
Жугу, шяраваллил жагьилми ва бугьарами хъинчулий ккаклай буру жагьилтурал дуллалисса даву, умудгу бур вания тихуннайгу укунна бусравсса ва кьимат ххисса цайми-цайми давурттугу дулланссар тIисса.
Аллагьнал кабакьиннав зуцIун!
Нурислан Хавчаев
