Ссавруннайва абадлий ливчIсса лачин

Ларгсса ххуллункьини,1- мур ЦIувкIравгу, Ваччавгу дия Совет Союзрал кIийла Виричу АхIмад- Хан Султаннул 100 шинал юбилейран хас дурсса мероприятияртту. Шагьрурдая ЦIувкIрав чIявусса хъамал бувкIун бия шяравучунал бюхттулсса арснал савлугъ дуллалисса давурттал чIарав бацIан.


ДяккурчIавсса гьайкалгу, лагма-ялттусса кIанттугу бакьин бувну бия. Мудана куна, ва даву дуван анавар увкмагу ххаллил­сса цIувкIрачу Аьлиханхъал МахIаммадар. Виричунал гьайкал цалла къатрал хьхьичI духьувкун, ванал мудангу кIай кIанттурду бакьин бувай. ЦIанакулгу, цува Кисловодскалия учIан къахъанай унугу, шяраваллил жагьилтурайн тапшур бувну бия гьайкал дусса кIанттул чIалачIин ххуй дуван.

Мукун бувнугу бия. Ххуйну оьрчIи- чIюлу бувну бия цIувкIуллал клубгу, Виричунал оьрмулия бусласисса стендругу дия чIирттайн лархъун. Байрандалий гьурттушинна дуван бувкIун бия лакрал чIири- хъунсса царагу мероприятие лях гьан къаритай­сса, Мариян Илиясовал цIанийсса «Дараччи» фондрал хъунмур Гульшан Хасаевагу, вава фондрал вакил хIисаврай Тарият Къапиевагу. Мукунна ххуйсса гьурттушинна дунни АхIмад-Хан Султаннул цIанийсса элмулул, кIулшиву дулаврил ва культуралул фондрал каялувчи Лаура Бакриевал ва вара фондрал вакил Илияс Дагъирмановлул.

Вайннал Виричунал цIагу, суратругу дусса футболкарду, кепкардугу хIадур бувну бия шадлугърай бачIин. Вава фондрал биялдарайсса ккуранни «АхIмадхановцынал» кьюкьригу. КIицI лавгсса фондрал Лакрал театрданущал уртакьну хIадур був­ссия АхIмад- Хан Султаннул оьрмулиятусса спектакль. Миву гьуртту хьусса чIава вирттавращал, Кьурбанов Сяидлуя ва Рамазаннуя (МахIачкъалаллал 1-мур гимназиялул дуклаки оьрчIру) тIайла хьуну, Ваччавгу, ЦIувкIравгу байран дуллалисса майданнайх, чIава «ахIмадхановцы» занай бия ттугъругу лавсун, Виричунал суратирттащалсса плакатирттащал.


Бия оьр­мулул бугьарамигу, ласнал, фронтовикнал суратращал бувксса Нурижат Муслимоваяту тIайла хьуну. ЦIанихсса пагьламантурал шяравалу хIисаврай цIа дурксса ЦIувкIуллалязисса арснал савлугърал байран пагьламанлахъулт бакъа пайда шайссияв? Увккуна гьунарду буллан Мяммаев Камил. Ва экстремал пагьламан ур, хьхьуттай цIу- цIусса гьунарду буллай, агьали хIайран буллалисса. Мюрщимигу, хъунимигу, жагьилталгу гьурттуну дурсса байрандалиясса пикрирдугу байрандалул сиптачитурайн барчаллагьрайсса бур.

МахIаммадбаг ХIусай­ханов, профессор, ЦIувкIуллал Жяматийсса советрал хъунама:
— ЦIанакул, пандемия сававну, бигьасса чIун дакъар, бучIан ччай бунува бучIан къавхьуссагу бувкIминнаяр чIявусса бухьун­ссар. Иш цукун багьарчагу, биялсса жагьилтал бувкIунни шагьрурдая, дакIнихтуну барчаллагьрай ура миннайн цинявннайн, Виричу лахъа- хъун уван лайкьссар, ва лахъа хъун уллайгу жувару ххуй хъанахъисса. Вирттаврал хIурмат уттисса никирачIа буссаксса миннал оьрмурду ва аьра­ли ххуллурду эбратну буссаксса, жагьилтурал тарбиялул гьанурдугу цIакьсса бикIантIиссар. ТIабиаьтралгу жуцIунма кабавкьунни, дарусса гъилисса кьини хьунни. Шагьрурдая бувкIми, муданма кунма, хъамал ххира­сса ЦIувкIуллал жяматрал ххарину кьамул бунни, байраннах шацI бувксса инсантурал дакIру тирх учин дувансса байран хьунни. Ва нюжмардий цаймигу дикIантIиссар юбилейрацIун дархIусса мероприятияртту, миннуйгу цIувкIуллал агьлулул ххуйсса гьурттушинна дуванссар тIисса, умудрай ура. Ваччату ЦIувкIравсса ххуллугу ххуйну бакьин бувну бия, вагу барчаллагьрансса давур.

Лаура Кьурбанова, АхIмад- Хан Султаннул цIанийсса фондрал хъунмур:
— Жу цалчин бакъару Ккуллал райондалий дуллалисса мероприятиярттай гьуртту хъанахъисса. Сант дагьну дунура, барчаллагь учин ччай бура мудангу жура дуллалимунил чIарав ацIайсса райондалул бакIчи Шамил Рамазановлухь. Жул фондрал дуллалисса давуртту цинярда, ци журалийсса духьурчагу, АхIмад- Хан Султаннул цIа жагьилтурал, дуклаки оьрчIал зумату щяв къадишаву ритаву мурадрайссар. Уттисса никиран мунал чувшиврия, инсаншиврия хавар бикIаву мурадрайссар. Гьарцагу мероприятиягу ва хIакьинусса байран кунна, чувшиврул дарсирал ххуллийссар.

Гульшан Хасаева, Мариян Илиясовал цIанийсса «Дараччи» фондрал хъунмур:
— 25 шинал оьрмулуву Совет Союзрал Виричунал цIа кIийлла ласун лайкь хьу­сса, дяъви къуртал хьуну мукьах­гу дунияллул авиациялуву цIа личIан­сса давуртту дурсса АхIмад- Хан Султаннул юбилей мунал буттал аьрщарай ххуйсса даражалий тIайла дуккаву — жяматрачIа мунал кьимат бюхттулну бушиврул барашиннар. Мукун бикIангу аьркинссар. ХIазран бакъар учайсса, Вирттал сагъссар миллат уттавану буссаксса, куну. ХIакьину Виричунал рухI рязийну личIансса даву хьуссар, мунал цIанил кьимат бюхттулну ябувансса жуйвасса буржгу бартбигьинсса бюхъу- хъитгу хьуссар.