Дагъусттаннал гуманитар институтраву 2020 — 2021-ку шинал байбивхьунни дуккавриву, элмийсса ахттаршиннардаву ва жяматийсса иширттаву хьхьичIунсса ккаккияртту чIалачIи дурсса студентътуран, магистртуран стипендияртту буллай.
Гъинттулсса аттестациялул хIасиллайн бувну, «Теология», «Лингвистика», «Журналистика», «Экономика» ва «Бизнес-информатика» тIисса элмурду лахьлай, хьхьичIунсса хIасиллу дурсса 22 студентнан булун ккаккан бунни вузрал чулухасса стипендияртту.
ДГИ-рал ректор МахIаммад ХIажидадаевлул бувсунни укунсса хIукму гьунар бусса, итххявхсса жагьилтал аьлтту баву ва миннал кIулшивурттал даража гьаз баву мурадрай бувшиву.
Му бакъассагу, вузраву махъсса кIира шинал лажиндарай дуккавриву хьхьичIун ливчусса студентътуран щайх АхIмад Апанни Аьбдуллаевлул цIанийсса стипендияртту буллай байбивхьуссар. Гьашину мукунсса стипендия ласлай буссар лингвистикалул факультетрай дуклакисса Жаватханова Саида.
Шиккува бусан, Дагъусттаннал гуманитар институт хъанахъиссар хIукуматрал бакъасса кIулшивуртту дулаврил идара. ХIакьинусса кьини вузрал дуссар, «Теологиялия» байбивхьуну, цинярда кIулшивуртту дулаврил программарттал паччахIлугърал аккредитация ларсун.
