Утти дянивмур даражалул школардай тарихрал дарсру дихьлахьисса учительтураща бюхъантIиссар, дуклаки оьрчIащал бувкIун, цалла дарсру Тарихрал паркраву, му музейрал интерактив заллаву дихьлан.
Мукун, Тарихрал паркравун дуклаки оьрчIащал дарсирайн бачин хьхьичI, учительнан www.myhistorypark.ru. сайтрай «Экскурсии» разделданий заявка кьаритан аьркинссар. Заявка дуллуну махъ Тарихрал паркрал пишакар учительнащалсса дахIаврийн уккантIиссар, дарс дихьлан хьхьичI мультимедий комплексрал методикалул каширду ххал дуваншиврул.
Тарихрал паркрал директор Тимур Велихановлул бувсмунийн бувну, жулла республикалул хъун шагьрулул дуккаврил идарарттал чулуха ва журалул дарсирдахсса къулагъас ларайсса дикIан най дур:
— Дарсирдай, классраву щябивкIун, преподавательнах вичIилийми дарсру личIийри, экскурсиялийн бувкIун, жул мультимедий комплексрал каширду щаллуну ишла дурну дирхьуми дарсру лапра личIийри. Шикку оьрчIру ттизаманнул технологиярттал щаллуну тарихрахух гьан бавантIиссар. Телефонну, компьютерду ххирасса уттисса оьрчIан шиккусса дарсирдай бавмур, ккавкмур хъинну ххуйну дакIний личIавантIиссар. Лахьлахьимур оьрчIал бакIурдиву хъиннува цIакь буван кумаг хьунтIиссар викторинардая, интерактив луттирдая, тачскринная. ДакI дарцIуну ура укунсса дарсру оьрчIан ххира хьуншиврий,- буслай ур ва.
Бадрижамал Аьлиева
