Октябрьданул 20-нний «Дагестан» РИА-лий хьунни хъиривмур зуруй МахIачкъалалив хьунтIисса Дагъусттаннал Экономикалул форумран хасъсса пресс-конференция. Журналисътурахь форумрал сакиншиндарая ва мунил мурадрая бувсунни Стратегиялул проектирдал агентствалул хъунама Бахттияр МахIмудовлул ва Санк-Петербурграясса Бизнес кластерданул каялувчи Максим Никитскийл.
Залму АьбдурахIманова
Шиккува дакIнийн бутан, жулла республикалий махъва-махъсса укунсса форум бавтIун бивкIссар 2012 шинал.
Сакиншинначитурал бусаврийну, форумрал мурад бусса бур дахьра цалла бизнес щурущи дурссагу, республикалул экономика лядуккан давриву чIярусса шиннардий зузисса ишбажаранчиталгу цачIун бансса, иш багьни цаннал чIарав ца бацIаншиврул, хасъсса шартIру дузал дувансса чаранну ляхъланшиврул. Хаснува гьашинусса пандемиялул ккаккан бувну бур ишбажаранчишиву экономикалул яла кIюламур кIану бушиву.
Мукунма форумрал мурад бавхIуну бур ишбажаранчитураву хIукуматрайнсса вихшала дишин баврицIунгу.
Шикку цанна аьркинсса кIулшивуртту ва цIушиннарду лякъинтIиссар, чIиримур ишбажаранчишиврухун багьминнан дакъасса, туризмалул, промышленностьрал, энергетикалул, шяраваллил хозяйствалул, кIулшивуртту дулаврил аралуву зузисса ишбажаранчитурангу.
«Аьрасатнал чIярусса регионнай ишбажаранчитурал дуссар сакин дурну цаннащал цаннал цала даврил опыт бачIин лахьхьин буллалисса ккуранну. Дагъусттаннайгу циняр шартIру дур укунсса ккуранну щурущи дансса.
— Зул халкь маэшат бан кIулсса, маэшат бумуния мюнпат ласун кIулсса бур. Амма ми цанная ца ят бувцсса кунма, цанная ца хавар бакъасса кунма щуруй бур. Жун ччай бур миннахь, цумур-цагу захIматшиврухун багьарча, цаннал ца бугьаврия, чIарав бацIаврия миннан цала гужгу, цалла ихтиярду дуруччинсса каширдугу чIярусса душиврия бусан,- кIицI бунни Максим Никитскийл.
Форумрал спикерталну бикIантIиссар, Дагъусттаннал ишбажаранчитал бакъасса, федерал даражалул пишакарталгу, Дагъусттаннал хIукуматрал къуллугъчиталгу.
Бахттияр МахIмудовлул мукунма кIицI бунни, шикку хIукуматрал вакилтуращал хьунтIисса хьунабакьавурттай ишбажаранчитурачIа цала буруккинттая, цанна хьунадакьайсса захIматшивурттая, дахчиннардая бусансса хIалу дикIантIишивугу.
Ва форум хьунтIиссар ноябрьданул 25-нний Дагъусттаннал паччахIлугърал шяраваллил хозяйствалул университетраву.
Форум хьуннин ттигу мадарасса чIун духьувкун, сакиншинначитал зунтIиссар ишбажаранчитурал дяниву чIявусса ихтилатру багьайсса масъалартту ва миннан кумагран хьхьичI ххуттайн ласунтIисса чаранну ххал бигьавриха.
