[dropcap]С[/dropcap]ентябрьданул 26-нний МахIачкъалалиясса лаккучу Юсуплул арс Руслан Юсуповлуйн оьвкуну бур ДР-лул Автомобиллал ва мотоциклетирттал спортрал федерация тIитIаврил шадлугърайн.
ХIасан Аьдилов
Му тIивтIуну махъ мура кьини тарихраву цалчин хьуну дур Дрифт-фестиваль. Дрифт -му гужсса бущилий ссур бувну нанисса машинарттай цакуну дуламартту давур.
Дрифтрал бяст-ччаллавух гьуртту хьунни кьунния ливчусса спортсментал щалва Ухссавнил Ккавкказуллал федерал округрайсса республикарттаяту. Муний цалчинмур кIану бувгьунни Руслан Юсуповлул, мунан дуллунни му ххувшаврил хIакъиравусса ХIурматрал грамотагу, кубокгу, арцуйнусса бахшишгу.
Утти Русланнул хиял бур билаятрал цIа дурксса дрифтрал спортсментуращал ччалли уккан. Ванал умудгу бур Дагъусттаннал жагьилтурал чялишсса хIала-гьурттушиву дуллантIишиврийн автоспортрал бяст-ччаллавух.
Русланнул нину-ппу Ххалаккиял шяраватуссар. ОьрчIнияцIава машхул хъанай ивкIссар техникалухун, хаснува машинарттахун, арснацIун авкьуну ивкIссар шофернал даву хъинну кIулсса ппугу.
МахIачкъалаллал 27-мур школа къуртал бувну махъ, Руслан машхул хьуну ур машинарттахун, миннул анаварну ссур шаврил дахханашивуртту дуллан лавхьхьуну бур. ЦIубутIуй га машхул хъанай ивкIун ур картинграхун. Шиккува бусан, Русланнул ххуллийх авчуну ур мунал арс Мурадгу. Школалий дуклай унува, мунал хъинну ссур байсса бивкIссар машинагу, картингралмур машинагу.
Русланнул цала канил батIайсса бия зия хьусса машинарттаяту щаллусса картинграл машина.
Яла, дрифт хIасул хьувкун, Руслан Юсупов машхул хъанай ивкIссар му журалул спортрахун. ЦIанасса ппурттуву дрифтрал спорт хъинну машгьурну дур щалла дунияллий, мунияту Руслан махъсса 5-6 шинал мутталий агьну ур му журалул спортрахун. Мунихун агьну махъ, лаккучу гьуртту хьуну ур дрифтрал бяст -ччаллавух Ухссавнил Ккавкказуллал цаппара республикарттай (Чачаннал, Ингушетиянал). Му чIумалсса бяст-ччаллавух Русланнуяр ххишала цама дагъусттанлув къаивкIссар. Русланнул бусаврийну, ми бяст-ччаллил чIумал мунал чIарав ацIансса инсан хьуну ур так мунал арс Мурад.
БуттацIа лархьхьуну дур мунал арснангу машинартту ссур баврил мухIлухIин, хаснува картинграл бяст-ччаллавух гьуртту хъанан. ДукIу гъинттул Грозналий чIявусса спортсментал гьуртту хьусса бяст-ччаллаву Мурадлул бувгьуну бур 2-мур кIану.
Руслан Юсупов бяст-ччаллавух гьуртту шайссар БМБ маркалул машиналий ТОЙОТА-лул моторгу бивхьуну, мунил кьуват бур 260 балчаннулуксса.
