Ирсирай дирмур ядигарну ядан

Ккуллал райондалул бакIчи Шамил Рамазанов

Сентябрь зурул 24-нний Ваччав хьунни фестиваль. Гьай-гьай, коронавирус тIисса цIуцIавриягу мугъаятну дунни фестиваль. ХьхьичIарасса шиннардий гьуртту хьун бучIайссия цайми зунттал районнал коллективрдугу. Гьашину ми бакъая. Мунияту райондалул 14 шяраваллил ккаккан дунни цала-цала шяраваллин хасъсса, къатта-къушлил кушурдая тIайла хьуну, къатлуву ишла дуллай бивкIсса манкьулатругу ккаккиялун дирхьуну личIи-личIисса аьдатру.

ХIажимурад ХIусайнов
Хъусращиял ккаккан дунни кIарттул ччатI бущайсса кIара бувайсса куц. Ккуллал шяраваллил душварал рангсса ххаллая чантайртту байшиву ччянива жунма кIулли, кка­ккан бунни ми щащайсса куц. СумбатIуллал душварал кка­ккан бунни карунних нигьир­ттай хъувухъу гьаяй­сса куц. Ваччиял ккаккан бунни жалиндалул хъирив булайсса буттукьри байсса куц. Вихьуллал душру дуссухун бувкIун, ца душ къатIуй ппал дюхлай, гамур ккургъанна дуллай бия.

Ссухъиящиял ккаккан бунни силлукьул чIапIаву нис дахIайсса куц. 2-мур ЦIувкIуллал — чIатулттив, хъурзилтту дувайсса куц. Къяннал шяраваллил ккаккан дунни хьхьичIара хъинну сийлий диркIсса къалайчинал даву. Цинярда шяраваллал цIарду кIицI къадарчагу, бия шиккува нувцIи бишлай, щивщу буллалисса ва цаймигу давуртту дайсса куц ккаккан буллалиссагу.

Фестивальданувух гьурттушинна дан ва гьуртту хъанахъимигу барча бан увкIун ия Ккуллал райондалул бакIчи Шамил Рамазанов, бакIчинал хъиривчу Аьжув ХIусманов ва цаймигу къуллугъчитал. Вай ялтту бувккуна циняв шяраваллал къатта-къуширттал. Бисмиллагь бувуна лакку дукрардал.

Муния махъ шяраваллал культуралул зузалтрал ккаккан дунни аьдатру, къавтIавуртту, увкунни балайрду. 1-мур ЦIувкIуллал шяравасса хьхьу­ттайх лахълахъисса душнилгу ккаккан бунни цаппара номерду.
Тамашачитал чансса бивкI­хьурчагу, фестиваль хъинну кIанийн дагьан дурну дия.

Читайте также: