ЦIуссалакрал райондалул бакIчи МахIаммад-ХIажи Айдиевлул оьвкуну Дагъусттаннайн бувкIсса Аьрасатнал Виричув Андрей Тепериклул нину-ппу ва гъан-маччами Дарбант шагьрулийнгу бивунни.
ЦIуссалакрал райондалий вай гьуртту хьунни 1999 шинал сентябрь зуруй ЦIуссалакрал аьрщарай хьусса дяъвилул иширттаву жанну дуллусса вирттавран хас дурсса мероприятиярттай. Ххал бунни боевиктурайн данди авцIуну Тепериклул жан дуллусса спортзал, бивунни къизгъинсса талатавуртту най диркIсса Телевышкалийнгу. МахIаммад-ХIажи Айдиевлул сипталий шикку бувну буссар аьрали музей, дацIан дурну дуссар лахъазанттул цIанийсса талатавурттаву жан дуллусса милицанал зузалтран ва аьралитуран гьайкал.
Вышкалул ялув бивщуну буссар Аьрасатнал ттугъ.
Хъирив кьини райондалул каялувчинал хъиривчу ХIажи ХIажиев бакIчисса администрациялул делегация ва Липецкаллал областьраясса хъамал лавгунни Дарбантлив.
Вайннал ххал бунни Нарын-Къала, Аьрасатнаву яла хьхьичIвамур мизитран ккаллисса Жумяъ-Мизит, музейрал комплекс.
Цалчин Дарбант ккаклакисса Липецкалиясса хъамаллуран хъинну ххуй бивзунни тарихрацIун бавхIусса шагьрулул цIанихсса кIанттурду. Ххуй дирзунни нахIура-нахIусса дагъусттаннал дукрардугу
Лажин хIадур дурссар
Андриана Аьбдуллаевал