Ларгсса тталаткьини Дагъусттаннал БакIчинал къуллугъ чIумуйну бартбигьлагьисса Сергей Меликовлул коронавирусрал азар ппив хьун къаритаврилсса буллалисса Оператив штабрал заседание дунни. Микку, коронавирусрал хIакьинусса тагьардания буслай, Меликовлул кIицI лавгунни тагьар ххуйсса дакъашиву, мунияту бугьарасса инсантал карантиндалийн бичаврил ва чIявусса халкь бусса кIанттурдай маскарду лаххаврил тIалавшинна закондалийну цIакь дувансса ният душиву.
П. Рамазанова
Роспотребнадзорданул управлениялул хъунама Николай Поповлул вай чаранну хъин чулий ккаклакисса ихтилат бунни. ЦIуллушиву дуруччаврил министр Жамалуттин ХIажиибрагьимовлул бувсунни республикалий коронавирусрал къашавайми хъин буллан 51 медициналул идаралий 3226 кIану хIадур бувну бушиву, миннуватугу 809 кIану бачIва бушиву.
Сергей Меликовлул, ихтилатирттахгу вичIи дирхьуну, чIурчIав дунни цайми регионнайгу, коронавирус ппив хьун къаритансса чаранну ккаклай, ялув бавцIуну бушиву.
Мукунма итникьининия тинмай Москавуллал областьрай чIяву халкь батIайсса мероприятиярттай къадагъа дирхьуну душиву, маскарду лаххаву тIалав къадулларча, жучIарагу ва тагьар оьнура оьлукъин бюхъайшиву.
