Агьалинал мурадру щаллу баврил цIаний

Октябрь зурул 6-нний Аьрасатнал Федерациялул ПаччахIлугърал Думалул депутат Аьбдулмажид МахIрамовлул агьали кьамул бунни манзилданул режимрай.

Имара Саидова
ДепутатначIан оьвтIисса агьалинал масъалартту бия къатта-къушлил шартIру къулай даврил, аьрщи итадакьаврил, КФХ-рттан субсидияртту булаврил, коронавирусрал къашавай хьуминнан реабилитация даврил хIакъиравусса.

Чапаевкаллал шяраву ялапар хъанахъисса Анжела Щамхалова оьвтIий бия ЦIуссалакрал райондалий аьрщи дулаврил хIакъираву кумаг бува тIий миннат буллай. Ванил бусаврийн бувну, 10-хъул шинал мутталий яржа бияннин ялугьлай бусса бур цинна дулун ккаккан дурсса аьрщи итадакьиннин. Мукунма ванил бувсунни, цуппа мукьва оьрчIащал лаякъатрай захIматсса тагьарданий ялапар хъанай бушиву. Депутатнал ва масъала , ЦIуссалакрал райондалул администрациялийн ча­гъар чивчуну, дузал бан тапшур бунни.
Хъирив Тарумовский райондалий ялапар хъанахъисса Рая Дюкова оьвтIий бия пенсиялул тIайлашинна даврил хIакъираву. Ванил бусаврийн бувну, II-мур группалул инвалидтуран ккаккан дурсса ххишаласса арцу дукIлай дакъасса дур. МахIрамовлул махъ буллунни, Дагъусттаннал пенсионный фондрал каялувчи МахIаммад Исяевлуйн тапшур бувну, бюхъайсса кумаг ва масъалалул хIакъираву тIалав бантIишиву.

Рутуллал райондалиясса Минкаил Улуханов оьвтIий ия Шяраваллил хозяйствалул министерствалул КФХ-дан итабакьайсса субсидияртту булун кумаг баврил хIакъираву. Ванал бувсунни 30-хъул шиннардий I000 ризкьи бусса «Мурад-5» тIисса КФХ сакин дурну зий ушиву. ХIакьинусса кьини цувагу усса ур ДР-лул Имуществалул министерствалущал аьрщи арендалий ласаврил хIакъиравусса кьутIи дан къабюхълай. Аьбдулмажид МахIрамовлул, гара ссят Рутуллал райондалул бакIчинайн оьвкуну, тIалав бунни Минкаиллун кумаг баву.
Депутатнал ва кьини цачIанма оьвкусса агьалинал масъалартту кутIасса чIумул мутталий дузал баву лавсунни цала бакIрайн. Цаймигу цIурувкьюсса масъаларттал хIакъираву бунни маслихIатру.