Цалчинмур ЦIувкIуллал шяраватусса, оьрму Къазахъисттаннай лавгсса захIматрал ветеран ХIажиев Рамазан жул кказитрал ляличIисса буккур учирчагу, тIайлану лякъинссар. Ванал «Илчи» кказит буккайссар Гурьеврай арсурваврал интернетрава распечатка дурну буккан бувну. Цала тIийкун, кказитрал электрон версия ванан кьамулну дакъар, кказит канил бувгьуну къабувккуссаксса игьакъалагара тIар. ЖучIангума лавсун увкIунни мукун распечатка дурсса кIива номер Гурьеврая.

---

ПатIимат Рамазанова
[dropcap]В[/dropcap]анал тих сайки 60 шин дурну дур, мачча- гъаннал увцуну ур цувагу тихун . Ссяткарнал касмугу лархьхьуну, ччяния шинай оьрму бутлай ур тих. Тамансса хIурматрал грамотарттан ва лишаннан лайкь хьуну ур. Яла хъунмур бахшишнурив, ванан дур цува тихсса агьулданун хъинну бусравну ушиву. Къазахъисттаннал агьлу дусшиву дангу , хавар бусангу кIукIлусса, аьчухсса, ххуйсса агьлу бур тIий ур, гьар ишираву тих низамгу дур тIий ур.

Сайки 15 хозяйство 1-мур ЦIувкIуллал дур хIакьину Гурьеврай. Ми цачIунмай буван, хIала- гьурттушиву хIура дуккан къаритан хIарачат буллалиминнавух Рамазангу ур. Уттигъанну жул редакциялийн учIаврил мурадгу ванал, Совет Союзрал кIийла Виричу АхIмад- Хан Султан шяравун увкIсса чIумуя бусансса дия.

-На чIивисса оьрчI ура, шяраваллил жямат хьхьу- кьини хIадур хъанай бия Виричу лайкьну хьунаакьин буттал аьрщарай. Му учIантIисса шагьраххуллийн бивчуну бия ряхцIалвахъул бартбису, цивппагу ххуй- ххуйми. Жунний бикIайссия мукьра метра лахъишиврийсса, шанна утташиврийсса туркман бартбису, гагу бувтун буссия. Виричу «Виллис» маркалул машиналий ия. БартбисурттачIан бияйхту, щупирнал машина бацIан бувна, бартбисурттайх лахъан буван дакI къадирну. Авурсса балчант бия хIадур бувну, ненттабакIраву кIяласса гьайчалигу бусса, АхIмад- Ханнун булун. Та кьини, СумбатIуллал Гъазуя тIайла хьуну, лагма- ялттусса, чIаххуврайсса щархъавагу биялсса агьлу бувкIун бия шяравун.

КIива лухIи ризкьи , ацIниясса яттил хIайвант бивххуна. Школалул хIаятраву ряхва хъуни кIункIур бивзун бия. Журат дусса, я щунал ябацIансса АхIмад- Хан Султанма ламусну ия цахава буллалисса хIурматрая. Ганащал архIал ия Аьрасатнал халкьуннал артист Ярагъи ХIажикьурбанов, уссурвал кунмасса дустал бикIайва. Машина янин ххал къашайсса та ппурттуву Ярагъинал, Совнаркомрайн лавгун, машинагу тIалав бувну бия. Шяраваллил жяматран хъуннасса тирхханну хьуна та кьини. АхIмад- Хан Султаннул 100 шинал юбилей гъан хъанай дур, ва датагу виричунан лайкьну кIицI лаган аьркинни жура»-тIий ур Рамазан.

Ца цамур миннатгу бур Рамазан ХIажиевлул:
-Жулва лакрал къуллугърай ивтсса лаккучувнайн кIисри тIитIлатIисса хасият дур. На гьарцагу лаккучувнахь тавакъю буллай ура: лагма лагияра, чIарав бацIияра, ххуймур гьаз буллалияра, жулва жува гьаз буллан аьркинссару. Жунма жува ххирану ва бусравну бухьурча, чингу ххирасса ва бусравсса бикIантIиссару. АхIмад-Хан Султан кунмасса жулва вирттаврал аьпагу узданну ябуван буржлувссару»- тIий ур Гурьевраятусса хъин хъамаличу.