Ванал махъру хIакьинугу тикрал буллайнма буссар

Ва шинал сентябрьданул 10-нний 70 шин хьунтIиссия жяматий­сса ва политикийсса ишккакку, Ахъушиял райондалийсса Уручуллал шяравасса МахIаммадов МахIаммад Аьбдуллул арснан.

СССР-данул шиннардий МахIаммадлул бивтссар захI­матсса ва агьамсса ххуллу, тIалавшиннарду дусса партиялул ва совет хIукуматрал органнал давурттай зий, КПСС-рал райкомрал инструкторная республикалул шагьрулул бакIчинал къуллугърайн ияннин.
Ванал каялувчинал ва сакиншинначинал даврил пагьму бушиву чIалай, ва мудангу тIалавну ивкIссар паччахIлугърангу, жяматрангу.
Ванал хъунмасса бутIа бу­ссар та чIумалсса республикалул багьу-бизу ва экономика хьхьичIуннай давриву.

ДакI-аьмал ххуйсса, хъярч-махсара бан кIулсса дакIнил заллу ия МахIаммад. ЦачIуминнал дянив ванал хIурмат лавайсса бия.
МахIаммадлул бувтсса оьр­му эбратну хъанахъиссар, бу­ттал кIану ххирашиврулгу, гражданинналгу, цала язи дургьусса даврилгу хIасиллу хIисавравун ларсун.
Амма оьрмулуву мудан баргъ бивтунма къабикIай.

Ванал кулпатраву хьуссар дарщуссагу кьинирду. Ца акъа-акъсса арс авцуну, тIалав дуллай бивкIссар арцу.
МахIаммадлул лавайсса интеллектгу, хъярч-махсарагу, дусшиву дугьавугу кIулссар мунал дустурангу, даврил уртакьтурангу, гъан –маччанангу. Ванал увкусса махъру ва калимартту кIура дарну дур шяравусса халкьуннал дянив сайки учаларттайн.
Оьрмулуву дурмур ва кьариртмур гьануну шай дунияллия лавгсса инсан дакIний личIаву. МахIаммадлул дурсса къатри мудангу нузру тIиртIуну дуссар, ванал тIиртIусса дакI кунна, цума-цаннангу.

Цувама увччуну уссар ниттил ва буттал чIарав, ваца рахIатну шанашисса куна.
Алжан буллунав, бунагьир­ттал ялтту Аллагь учIаннав цал! Амин!

Мудангу ина дакIнийсса
дустал, даврил уртакьтал
ва гъан-маччами