Аьрасатнал агьулданул аьдадрал цIусса сияхI

Гьашину октябрьданул 1-нния 31-ннийн дияннин дуван аьркинссия Аьрасатнал щалагу билаятрайсса агьалинал сияхI цIуну ххал дигьлагьисса хъуннасса даву (перепись). Утти, санитар-эпидемиологиялул тагьаргу сававну, хIукму хьуссар му дуван 2021 шинал апрельданий.

З. АьбдурахIманова
Росстатрал каялувчи Павел Малковлул бусаврийну, перепись дантIиссар ттизаманнул техникагу, интернетрал каширдугу ишла дурну. ЦIушиннарду хьхьичIра-хьхьичI щуркIал хьунтIиссар къатра-къатравух буклай агьалинал сияхIру дуллантIисса пишакартуран. Миннан къабагьантIиссар утти ххилан цала хъачIунттай чагъардалгу бувцIусса кIусса чантайртту. Перепись дуллай занантIисса пишакартурал канихь дикIантIиссар интернетгу, зузисса чивчуцири информация цивува ябантIисса планшетгу. Вай планшетру дуллай байбивхьуну бур гьашину июнь зуруй Москавлив ва Ивановскаллал областьрай.

Щалагу Аьра­сатнал агьалинал перепись даншиврул итадакьинтIиссар 360 азарда планшет. Ца планшетрал кIушиву дусса дур 700 грамм. Перепись дуллалийни, батарейка щябивкIун, зун къахъанай къаличIан планшетрацIун личIину итабакьинтIиссар 10 азарва мАч бусса аккумуляторгу. Планшетирттал цалчинмур партия цаппара регионнайн дучIантIиссар сентябьданий. Цанчирча переписьрал цалчинмур ятIап дайдишин багьлай буну тIий Аьрасатнал хъинну архсса, инттунин микI, марххала къабассайсса, поездру, жамирду гьан-бучIан захIматсса кIанттурдай. Перепись дурну къуртал хьуну махъ 40 азардаксса планшет Росстатрал цичIара дитантIиссар, ва лирчIми дулунтIиссар хIукуматрал личIи-личIисса къуллугъирттахьхьун цифрардал экономикалул лябу­ккулун ишла дан.