Сентябрь зурул 25-нний 1925-ку шинал увссар Хъунмасса Буттал кIанттул цIанийсса дяъвилул гьурттучи, цIанихсса журналист, тарихрал элмурдал доктор, профессор Жамалуттиннул арс МахIаммад Буттаев.
Дяъвилий къучагъну талай ивкIсса саллатIная байбивхьуну, республикалул «Совет Дагъусттан» тIисса журналданул хъунама редакторнайн, Дагъусттаннал Журналистурал союзрал хъунаманал къуллугърайн бияннин МахIаммад Буттаевлул бивтсса лахъисса ва бусравсса оьрмулул ххуллия жу бувсъссия Ххувшаврил байрандалуцIун бавхIунугу («Илчи» №19).
ХIакьинурив увсса кьинилун хасну ришлай буру ванал лагма-ялтту бивкIминнал дакIнийн бичавуртту.
Андриана Аьбдуллаева
[dropcap]Б[/dropcap]уттал шяраву Ккурклив МахIаммад ххирая цинявннан, мюрщи оьрчIая тIайла хьуну, къари-къужрайн бияннин. Къаххира хьунсса акъая цувагу. Ва шагьрулия увкIсса чIумал, шяравалу уттара дуккайва, Ккурккуллал ккурчIай аргъ дизайва. Гьарицама МахIаммадлуйн хъамалу оьвтIий, ванал хIурмат бан чялиш увккун икIайва.
КкурчIав щяивкIсса МахIаммадлул лагма лавгун, гъирарай вичIи дирхьуну бикIайва ванал бусласимуних. МахIаммад цувагу ия ихтилатран пасихIсса, мукъуй цIу бусса, хъярч-махсара бан кIулсса. Укун Ккурккуллал ккурчIав щяивкIсса чIумал бавтIхьунссия ванал Ккурккуллал хъярчругу. МахIаммад гьарица чулуха гьунар бусса ия. Ца авурну къавтIунгу изайва. Ванал тямадашиву дуллалисса хъатIал-мажлисирттал сий личIирасса дикIайва.
ЧIалачIингу, лаххи-ликкиягу, махъ-ихтилатгу… Цила икIайкунсса интеллигент ия.
МахIаммад шяравучу, гъанчу акъассагу, ттул преподавательгу, коллегагу хъанай ия. На журналистикалул отделениялий дуклакисса чIумал ттухь дарс дирхьуссия ванал.
Коллегахъул хIисаврайгу жу чIявуну личIи-личIисса мероприятиярттай хьунабакьайвав. Журналистурал дянив ванал сий хъуннасса дия.
Дагъусттаннал журналистикалул патриарх учайва МахIаммад Буттаевлуйн. Мяйжаннугу, Дагъусттаннал журналистика хьхьичIуннай давриву, мунил даража гьаз бавриву ванал захIматрал бутIа хъунмассар. МахIаммад ия дакIгу, аьмалгу, тIуллугу уздансса адимина. БивкIугу ванал цахава лавхьхьусса хьуна. Журналистурал балданий цала зумувну авурну лезгинкалийгу ивзун, лавгуна дунияллия МахIаммад.
Ва Ккурккуллал жяматран, цинявппагу цала лагма-ялтту бивкIминнан мудан дакIний икIантIиссар, ванал цIа хIурматрай зумух ласлантIиссар.
Буттаева ПатIима, кулпат
МахIаммадгу, нагу, 1-мур классрава байбивхьуну 7-мур классравун бияннин архIал дуклай бивкIссару.
Школа къуртал бувну махъ ва аьралуннаву къуллугъ бан лавгуна, нагу, педучилищагу бувккуну, Кьубиял школалий байбихьулул классирттал учительну зун бивкIра. МахIаммад армиялия зана хьуну махъ кIиягу рязину ташу барду. На тачIав пашман къавхьуссара ттула оьрмулул дусну ва язи угьаврия. МахIаммад ичIува хъинну рахIатсса, аьчухсса ия. ТачIав лахъсса чIуний ихтилат къабувссар, ккиш-кьянтI къаувкуссар. Аякьа дусса ласгу, ппугу ия. Пиш тIий акъа шавай къауххайссия. ОьрчIангу ванаха чIалачIин къадикIайва. Цаламиннан ххирану ча къаикIави, щалагу хIаятравусса оьрчIан ххирассия. Ва най ккаккайхту, цинявппа хьунийн левчуну, ссурссулухун лачIайва, МахIаммад чIявуну хIаятравусса гаражраву икIайссия. Гивунгу батIайссия оьрчIру цала дакIниймур бусан. Гьарнащалгу аьмал-хIал бавкьусса икIайва. Цащава шайсса кумаг бан, чIарав ацIан хIарачат буллан икIайва. Дусталгу чIявусса бия, хIатта, дазул кьатIувгума.
МахIаммадлул библиотекалуву ккавкссия ттун 1923-ку шинал бувксса, мужаллатрай Заира Хизроевал суратгу дусса цалчинсса номер «Горянка» журналданул. Гиву бия личIи-личIисса хьхьичIвасса изданияртту, Саэд Габиевлул, Гьарун Саэдовлул итабавкьусса кказитру, канил чичрурду. Цин лавхьхьусса архив.
«Ккурккуллал хъярчру» тIисса луттирал хьхьичIмукъуву Расул ХIамзатовлул чивчуну буссар: «Агар вила дакIний къумашиву духьурча – кIидачIи МахIаммадлущал, аьчух уккан антIиссара, дардиран дарман лякъинтIиссар,-укун учай Дагъусттаннай ттул дуснаяту».
Мяйжаннугу, укунсса, гьарнал дакIниймур лалавсун, га рахIат уккан ан ччисса ия. Цинявннащал тяхъасса, рахIатсса ия МахIаммад. Мунияту ухьунссия, ва гьарнан ххирассагу ия. ЖучIа бухху-букку чан къашайва. Москавлиясса, миха-тихасса хъамалгу чIявусса бикIайва. Лаккуяту бувкIмигу жучIа ликкайва, дуклан бувкIмигу бацIайва. Цинявннан аьркинмургу диялну дикIайва, дурсса дукрагу цинявннан гьа шайва.
ТачIав ябакI къабутайссия, лажин кIялану ччатI бишайссия. МахIаммадлул дус икIайва Аьбдулвагьаб тIисса. ЧIявуну учIайва ваначIан. Ганал учайва: «ПатIимай, зул багъ-бахча бакъанугу, столданий мичча дучIаймур чан къашай»,-куну.
ДакIний личIансса хьуна жул Москавливсса аьрххи. Цува докторнал диссертация дуруччин нанисса чIумал МахIаммадлул нагу бувцунав Москав ккаккан бан. Бувна дакIний личIансса экскурсиярду. Ккаккан бувна ЯтIул Майдан, Кремлилул Дворец ва цаймигу цIанихсса кIанттурду.
Итххявхсса ия, ччинийх ххуллу ласайва.
Ламара Ххаппалаева, душнил душ
[dropcap]Т[/dropcap]татта дакIнийн агьувкун, на тIааьнсса асардал вибуцIара, ттуйва бияла бакъа пиш тIун бикIара. Оьрмулул яла жагьилми шинну дяъвилул цIараву ларгун дунугу, дакIнил хъиншиву яхьуну дия бусса оьрмулий. Ва ия дазу-зума дакъа жувагу ххирасса, жунагу ххирасса, цила икIайкунсса ттатта. ДакIнийри, цинявппа мачча-гъанмигу бавтIсса ттаттачIасса музыкалул мажлисру. Ттаттал мандолина бищайва, нагу, хъуннабавалгу мунацIун бахIайссия: на – пианинолий, хъуннабава — ччергъилттуй. Цал-цал ттатта цувагу щяикIайва фортепианолух, кIула скрипка бищунгу.
Буттаевхъалгу, жулгу кулпатру оьнийгу, хъиннийгу цачIу бия. На щар хъанахъисса чIумалгу, гьай-гьай,
тямада МахIаммадъя. Ттул коллегахъул дакIнийн бутлайнма бикIайссар
цукун тяхъасса хъатIи бивкIссарив ттул, цукун авурну къавтIун излай ивкIссарив МахIаммад.
ЦIанихсса ттаттал гараж… Га хIаятравусса цинявннал чяйханая. Ттаттал бикIайва га, хьхьичIазаманнул матахI дирхьуну, чIюлу бувну.
ХьхьичIарасса самоваргу дирзна дикIайссия. ЧIарах нанима чара бакъа чяйлийн уххайссия, ттаттал хIазсса хавардах ва хъярчирдахгу вичIи дирхьуну, тяхъа-таза бувккун лагайссия.
Ттаттал ляхъан бувсса хавар бикIайссия мусил хазналиясса. ЧIахху-чIарахми бавтIсса чIумал, га цукун бачIинссарив хавардай бикIайва. Хъуннабава тIурча рязи дакъа дикIайва хазна чIаххуврайх циван бачIин аьркинссарив къабувчIлай. Ттаттагу, хъуннабавагу лапва цаннан ца бавкьусса, цаннал ца биял буллалисса, цаннан ца бувчIлачIисса караматсса чут бия. Ттаттал хъярч-махсарттал миннал дянивсса арарду хъиннура дюрчIан дайва, нахIу дайва.
Ттаттай, ина ияв ччинал эбрат ласунсса аьчухсса, авкьусса, уздансса, хIакьсса интеллигент. Мукун дакIний личIантIиссара ина жун мудангу.
Залмулавхъал МахIаммад, гъанчу
[dropcap]М[/dropcap]ахIаммадлул кулпат ПатIима ттул буттарссур. МахIаммад ччинал цала хьурдай учинсса куяв, гъанчу ия. На ччя-ччяни уххайссияв минначIан.
Самоваргу дирзун, чIахху-чIарахмигу лагма лаган бувну, мандолинагу бивщуну, циняв тяхъа буккан байссия. Циксса бухьурчагу, хъамаллурая бизар къашайва. Гьарцаннахь буса-учинмур лякъайва.
Ххирасса икIайва чIивинангу, хъунанангу. Инсантуран рахIатшиву, дялахъру дан ччисса икIайва. Буруккин бунал буруккин лаласайва, шайсса кумаг буллан икIайва.
МахIаммадлул бахшиш бувсса мандолинагу буссар ттучIа хIурматрай ябуллай. Ва канил бугьайхту, гай тIааьнсса асардацIун дархIусса чIунну дакIнийн дагьай, яхши-куявнал гьайбат уттарану хьхьичI дацIай.
Аьжа АьбдурахIманова, «Зунттал хъами» журналданул жаваблувсса секретарь
[dropcap]М[/dropcap]ахIаммад Буттаевлуя бусланмур, учинмур тачIав бухкъалаганссар. Фронтовик, журналист, чичу, элмурдал доктор, жяматийсса ишккакку… Дяъвилул цIарава ниттил дуаьрдал сагъну уккан увшиврий мукIрусса арс, аякьа дусса лас, ппу, тIайласса дус, ххаллилсса музыкант ва къавтIала.
МахIаммад учIайва жучIан цал буттал дус ва коллега хIисаврай, яла хIаласу хIисаврай.
Вайннал дусшиву хъиннура цIакь дурна оьрчIал дянивсса ташулул. Буттан ччан бивкIуна арснан МахIаммадлул дянивмур душ бувцуну. Ттул нину-ппу акьлу бусса бивкIун бур, вайннал гьарица арснан цанма-цанма бавкьусса, лайкьсса душру язи бувгьуна. Миннал цIакьсса кулпатругу хьунни.
Мусил МахIаммад учайссия жул кулпатраву Буттаевлуйн, цайми гъан-маччасса, чIахху-чIарахсса МахIаммадхъая личIи ан. МахIаммад, мяйжаннугу, гьарица чулуха мусилсса инсан ия.
Ттун хьхьичIва-хьхьичI МахIаммад ккавкссия Оьруснал театрдануву (цIана Къумукьнал театр бусса кIанай бикIайссия) Аьлил Амаевлул пьесалул премьералий.
Таний ттун 12 шин дия. Мунаяр цаярва та чIумал ттул дакIний ливчIуна сахIибулхайр дусса, цIагу ххуйсса ванал хъунмур душ Фиалка. Яла махъ, ттула ппу МахIаммад редакторсса «Совет Дагъусттан» журналданий литературалул отделданул хъунаману зун ивкIсса чIумал, на кIул хьура чIивимур душнищал Галящалгу (Х1урубича).
Галял ххуйну сурат дишайва. Яла-яла, буттауссу Юсуп –чавахъчинаясса чIивидушнил шеърирдал жу тяхъа буккан байвав. ЦIанагу бакIрайн багьай буттал луттирдаву.
Буттаевхъалгу, жулгу кулпатру оьнийгу, хъиннийгу цачIу бия.
На щар хъанахъисса чIумалгу, гьай-гьай, тямада МахIаммадъя. Ттул коллегахъул дакIнийн бутлайнма бикIайссар цукун тяхъасса хъатIи бивкIссарив ттул, цукун авурну къавтIун излай ивкIссарив МахIаммад. Яла-яла, баян бувна «Зунттал хъами» журналданул коллективрал къавтIаву. Тания шихуннай хIакьинусса кьинигу коллективрал къавтIаву редакциялий аьдатравун дагьну дуссар. МахIаммадлул хъярч-махсарттая цIа дурккун дикIайва.
Жул ичIура ци байран, ци мажлис бухьурчагу, Буттаевхъал кулпат чара бакъа бикIайссия, жугу – тайнначIа. МахIаммад цинярдагу журалул къавтIавурттай авурну изайва.
Лачакгу руртун, полотенцегу лялух дархIуну, хъаннил сумкагу бувгьуну, хъуннабава хьуну, хъаннил къавтIаву дурну цинявппа хъяхъи байссия. Хъяйнасса инсан икIайва.
Инсаннал дакI хъинсса духьурча, ганал дуллалисса гьарзатрай цIу бикIай.
Аьбдулбасир Аьлиевлущал
[dropcap]Б[/dropcap]уттаевлун кIула дусшиву, хIала-гьурттушиву дангу. Ва Журналистурал Союзрал хъунаману усса чIумал, вайннал редакциялийгу, Журналистурал Союзрайгу тиха-шиха бувкIсса бакъасса журалул хъамал къабикIайва. Яла МахIаммадлул ми циняв шаппай хъамалу буцайва. МахIаммадлулгу, ттула бутталгу миннан Дагъусттаннал цIанихсса кIанттурду ккаккан байва. ДакIнийри ца чIумал, МахIаммадлул оьвкуну, Иорданнава бувкIсса хъамал-дагъусттанлувтал. Миннащал бия Мариян тIисса ттул чIунархIал душгу (ппу лаккучу, нину-черкешенка). Университетрал чил мазурдил факультет къуртал бувсса ттуцIун цIакь бувна га. Марияннун оьрус маз кIулну бакъа, на ингилис мазрайн таржума буллай бивкIра. Мунияр махъ, 20-хъул шиннардий дахIаву дуну буссияв жу.
ДакIний дур, МахIаммадлул самовардануву дайсса чяй. ХIаятраву бикIайва вайннал гараж. Га бия библиотекагу, нукIузаманнул мурцIугу, чяйханагу. Гивун укъаххайсса инсан къаикIайва. Гиву, МахIаммадлул библиотекалуву ккавкссия ттун 1923-ку шинал бувксса, мужаллатрай Заира Хизроевал суратгу дусса цалчинсса номер «Горянка» журналданул. Гиву бия личIи-личIисса хьхьичIвасса изданияртту, Саэд Габиевлул, Гьарун Саэдовлул итабавкьусса кказитру, канил чичрурду. Цин лавхьхьусса архив.
Учин ччива, МахIаммадлул кулпат ПатIимагу ва цува кунма дакI тIиртIусса, хъамал ххирасса инсан буссар. Циксса хъамал бучIарчагу ненттабакI тIивтIуну кьамул байссар, махъра-махъмур хьхьичI дишайссар.
МахIаммадгу, ПатIимагу караматсса, цаннацIун ца бавкьусса лас ва щар бия.
МахIаммадлул жул цинявннал хъатIай тямадашиву дурссар. Нясив къавхьуна ттул арснал хъатIуй тямадашиву дан. ХъатIи бан ца зурул хьхьичI га дунияллия лавгуна.
Ккурккуллал лугъатрай пасихIну байсса ихтилатгу, хъярч-махсарттугу бан, цала зумувну исвагьину къавтIун изан нясив къавхьуна.
Га акъашиву асар хъанай бия цинявннан.
МахIаммад ия бургъия кунна нур нанисса, лагманан чани ва гъилишиву дуллалисса инсан. Жул кулпатраву ва мудангу аьпалувух ишайссар.
