Бусраврай дакIнийн утлай

Жула аьлимчу, публицист, литературовед, филогиялул элмурдал доктор, Ханнал арс Сулайман АхIмадовлун август зурул 25-нний хьунтIиссия 85 шин. Кьадарданул чичрулул ванияр шанна шинал хьхьичI личIи унни жуятува Сулайман.
Цува личIи хьурчагу, лакрал ва Дагъусттаннал литератураведениялул дунияллий ванал кьабивтун буссар биялсса ирс: 200-нния ливчу­сса элмийсса захIматру, лакрал литературалул тарих-таварих виттирикIлакIисса монографияртту, луттирду.
Юбилейгу бусраврай кIицI лаглай, цува аьлимчугу кьадрулий дакIнийн утлай, бишлай буру Сулайманнул оьрмулул дус Ссугъури Увайсовлул ванаха чивчусса вай поэзиялул ххаругу.

 

 

 

 

Сулайман АхIмадовлуха

Вил пикрилул кIивунни
Яргсса элмулул къавтIи,
Ганил ламараву бур
Пикрирдал суру къавтIий.

Элмулул къавтIилучIан –
ВичIан дустал бучIайва,
ЦачIун хьусса пикрирду
Гайннал вищал бачIайва.

Оьрму элмулул арив
Нарза ласлай лавгунни,
НицI дай най куна лехлай,
Гьаксса хIарачат бунни.

ХIарачатран хIаласса
Кьудрат вихьхьун дуллунни,
ТIутIив, тIин-тIааьн ххуйсса
Элмулул арив хьунни!

* * *

Вила оьрму ина
Лайкьну гьан бунни –
Элмулул ахъуву
Гьанна бувгьунни,

Гайннуй хьунтIиссар тти
Кьанкь яргсса тIутIив,
Никирал бичлансса
Элмулул къавтIив.

Читайте также: