[dropcap]Г[/dropcap]ьашинусса шин Аьлиллул арс Рамазанов Расуллул оьрмулуву дакIний личIансса хьунни — июньдалул 26-нний, цана цувалу, велосипедрай кIюрххила Каспийск шагьрулия увккун, гьан­ттайннин ванал Ккуллал райондалийсса

буттал шяравун, ЧIяв, ияннинсса ххуллу бивтунни. Ванан цаннагу дур 14 шин.

---

Расул увкIун ивкIун ур Ла­ккуя шагьрулийн, цала ни­тти-буттачIан гъинтнил каникуллайн. Ва гьарца кьини лагайсса ур шагьрулул паркравух, кучардайх велосипедрай бигьлан.
ЧIавасса жагьилнал гьавас ххисса дакIниву хIасул хьуну бур шагьрулия цала шяравун­сса ххуллу велосипедрай битан­сса пикри.
Ххуллийх ласунмунил пикригу бувну, хIадур хьуну ур ачин.

Цащалва лавсун бур велосипед дакьин дан ишла байсса ярагъ, запасрансса (ххуллийх нанийни баххана бан багьарчагу) камерарду, дуки-хIачIия ва да­ххана дансса лаххия.
КIюрххил ссят ххюра хьусса чIумал, лавхъун хъарайн аьрххилий ласай чантайгу, увккун ур ххуллийн. Каспийскалия буттал шяравунсса манзилданий шамийлла кутIасса ацIавугу дурну дур: дукра дукан, щин хIачIан, янна даххана дан ва велосипедрах уруган. Лаващав ивсса чIумал ахттайн бивзун бур. Лак­рал билаятрайх нанийни, Расуллун багьну бур нигьирал ца камерагу баххана бан.

[dropcap]Б[/dropcap]уттал шяравун ивсса чIу­мал ссят мяйннил дачIи хьуну диркIун дур. Шяравун ув­ххун нанисса чIумал тIурча, Расуллул хьхьичIун бувккун бур мунал дус­талгу, чIун архIал оьрчIругу.
Ва ишгу хIисав бан бучIир чIавасса жагьилнал яхIлил ца биялсса бутIану, цIуллу-сагъшиву дуруччаву мурадрайсса, цайминнангу эбратрансса давуну.
Расул, ина ванияр тихунайгу нанинийн иллай личIаннав!

Жул корр.