Ларгсса хамискьини Хъусращиял шяраву тIивтIунни ттизаманнул оборудованиялул лащу-щаллу бувсса цIусса ФАП (фельдшерско-акушерский пункт). Цувгу бувну бур «Устойчивое развитие сельских территорий» тIисса федерал программалул лагрулий.
ЦIусса къатраву бур цаппарасса кабинетру: процедурный, акушерский, дузалну дур лякьлуву оьрчI бусса ва оьрчI буллалисса хъамитайпалун аьркинсса анаварсса медициналул кумаг бансса гьарца шартIру.
Мероприятиялий гьуртту хьунни ДР-лул Халкьуннал Мажлисрал хъунаманал хъиривчу Камил Давдиев, шяраваллил хозяйствалул ва дукиялул министерствалул шяраваллал кIанттурду хьхьичIунмай баврил управлениялул каялувчи Эмил Ттаттаев, ДР-лул Жяматийсса Палаталул член Вагьаб Казибеков, Ккуллал райондалул администрациялул бакIчи Шамил Рамазанов.
Хъусращиял агьали барча буллай, Шамил Рамазановлул кIицI лавгунни цIусса ФАП тIитIаврийну шяраваллил кIанттурдайсса оьрмулул даража хьхьичIунмай хьунтIишиву, къашайшалтран, архну къалавгунма, анаварсса кумаг бан бюхъантIишиву.
[dropcap]Э[/dropcap]мил Ттаттаевлул бусласимунийн бувну, программа сакин дурну дусса дур, хасну шяраваллил кIанттурдайсса оьрмулул шартIру къулай даву мурадрай. Программалул лагрулий махъсса шиннардий республикалий тIивтIуну бур урчIва ФАП. Медициналул объектру бакъасса мува мурадрай шяраваллаву ялагу буллай бусса бур кIулшиву дулаврил идарартту, ххуллурду, щинаххуллурду, спортрал объектру.
Программа щурущи даншиврул 2020 шинал итадаркьуну дусса дур 1 млрд. 224 млн. къуруширттал. Дагъусттаннал шяраваллаву бантIий бусса бур 25 объект.
Му программа щаллу давриха зий дур шяраваллил хозяйствалул биялалийсса «Дагсельхозстрой» компания.
