Гъумук паччахI-ххуллий камерартту бивхьунни

Уттигъанну «Ростелекомрал» пишакартурал Гъумук банкрал, почталул, аптекалул ва цаймигу агьалинан бакъа чара ба­къасса идарартту зузисса агьамми кучардай камерартту бивхьунни. Вай бивхьуссар Лакрал райондалул администрациялул тIалавшиндарайн бувну. Жулла республикалий «Комфортная и безопасная городская среда» тIисса регионал программагу щурущи дурну духьувкун, кIичIирттаву, ххуллурдай, халкь гьарзаний хъанахъимур чIалачIи буллантIисса камерартту бишавугу ва программалул ца бутIану хъанай бур.

З.АьбдурахIманова
-Гъумук ялапар хъанахъимигу, жучIанма бувкIсса хъамалгу сайрданий, кьатIу-шав буккан, шяраваллил кучарду, ххуллурду бакьин буллай, чIярусса хъин-хъинсса давуртту цаймигу дуллай буссар. Цинявннан ххира хьусса Жагьилтурал паркравугу, Ханнал-БярничIагу сайрданий бувксса оьрчIругу, оьрчIал нину-ппугу чан къашай. Даврия махъ, ахттакьунмайгу, гикку бигьалаглагисса жагьи-жугьулт чан къашай. Гикку хъанахъисса гьарца ишгу онлайн-контрольданий камерарттай чIалай буссар. Утти ялун ххи бувми жу бишин пикри барду Сурхайханнул ва Имам Шамиллул цIанийсса кучардайгу,- тIий ур Лакрал райондалул бакIчи Юсуп МахIаммадов.

«Ростелекомрал» пишакарнал бусаврийну, камерартту бишаврицIун чан шайсса дур кучардайсса низамлиявуртту, машинартту ххяххан буллали­сса, ччи-ччинийн цIинцI, ччюрк экьидичлачи­сса ишру. Миннул духIайсса дур кьатIувсса ччимур температуралул дяркъу ва кIиришиву. Камерартту бишиннин залуннал язи дугьайссар видеоархив яхьуну ччисса чIун.
«Ростелекомрал» отделданул директор МахIаммад Бадишевлул бусаврийну, камерартту махъ ппурттуву жулла республикалий, агьали чIявусса шагьрурдай ва хъунисса щархъаву бакъасса, бихьлай бусса бур архсса, хъуни дакъасса зунттал щархъавугу. Ва иширалгу тасттикь буллалиссар уттизаманнул цIушиннарду, интернетрал ва цифровизациялул «ххяппа» кунна, лахъсса зунттал щархъавунгу дирнура душиву.