Гьашину Лаккуйсса гъи хъанай дур дюхлулсса. Нажагь ца-ца кьини кIири барча бакъа, кIиришиву мукссара дакъар. БакIрайра гъараллу дакъа диркIун, яла къурагьшиврул хъирив рахIматрал гъараллу ларчIун, уртту-щин кусану дур. Шяраваллавусса инсанталгу, ххулув баврил чулуха цивппа авара хьуншиву чIалай, машан ласлай бур арнил кIанттая.
ХIажимурад ХIусайнов
[dropcap]А[/dropcap]мма ттул хIакьинусса ихтилат махъсса зуруй бювхъусса хIухчил чIапIаятур. Инттухуннай дакъа гьаз хьун къархьусса ххяххия, вана утти, гъараллу ларчIун ца-кIира кьини гъилисса шайхту, чIаравсса урттуяр лахъи дурккун, вана жу шикку тIисса кунна, янилун дагьлан диркIунни. Гьай-гьай, ттун ихтилат буван ччива вай хIухчил чIапIив жула чурххан хъинну дармансса бушивриятугу. Буниялагу, Аллагьнал цIуцIавуртту инсаннан дуллуну духьурчагу, гай хъин дайсса дарув-дарманнугу жула ччанналува хIасул бувну бур. Дарув-дармансса урттул чулуха Лакку билаят, явара, хъинну авадансса кIану бур. Циняв аптекарттай дахлай дикIайсса ххяххияртту жучIара чIярусса дур.
Ца укунсса ттула оьрмулуву хьусса ишираягу бусан ччива.
Дарув-дармансса урттул чулуха Лакку билаят, явара, хъинну авадансса кIану бур.
Циняв аптекарттай дахлай дикIайсса ххяххияртту жучIара чIярусса дур.
Ца чIумал на МахIачкъалалия Дарбантлив «ЛАЗ» автобусрай най уссияв. Къаякантлиягу ливчуну, Герга тIисса шяравалу дитайхту, чIарах бувксса машиналул янила ливчусса чарил чIучIа, шофернал чулийсса чIавахьулттил пюрунгу гъавгъун, махъва-махъсса скамейкалий щяивкIсса ца адаминал иттацIанттуйн щуну, щаву дуруна. Автобусравусса пассажиртал, цизунссарив къакIулну,гьанавиххи хьуну бия. На, кьатIув увккун, ххуллул чIарату хIухчил чIапIив бувну, щаву дирсса инсаннал бакI махъуннай лахIан дурну, щавулий чIапIи бивхьуну, оь бацIан бувссия. Циняв бия на хIакин ухьунссар тIий. Гьай-гьай, нагу, ури бувну, нава хIакин ушиву бувсъссия. Химиялул лагрулий бувсса дарувгу бакъа чара бакъар. Амма жула Лакку билаятрал урттуйнусса дарув-дарманнугу ишла булларча, хъиннура инсантурал цIуллу-сагъшиву ххи хъанай дур. Ишла буллалияра тIабиаьтралми ххяххиярттал дарув-дарманнугу.
