Луттирдал буруккин щаллу шавай бур

Дуккаврил шин дайдишинсса хIадуршиндарал давурттавух ца яла хьхьичI ххуттаймур цIусса луттирдал щаллу банмур дур. ЧIал къавхьуну, шагьрурдал ва щархъал школарттайн ми биянгу бантIиссар.


З.АьбдурахIманова
КIулшиву дулаврил ва элмулул министерствалул пресс-къуллугърал бусаврийну, школарттал буллусса аьрзирдайн бувну, гьашину библиотекалул фонд 119 азарва экземплярданул авадан хьунтIиссар.
Биял къахъанахъисса лу­ттирду машан ласун республикалул бюджетрава итабавкьуну бивкIссар 54 миллион арцул. Ва даву КIулшиву дулаврил министерствалул гьар шинах дувай­ссар. Масалдаран, 2018-2019 шинал машан лавсун бивкIссар 2 миллион ва 200 азарва лу, 2019-2020 шинал – 150 азарва лу.
«Сайки кIира шинал хьхьичI жула школарттай луттирду биял къахъанахъимур масъала ца хъинну цIюрувкьумур буссия.

Луттирдал щаллушинна школарттай дия 58 процентрайн дирсса. Вай кIира шинал мутталий ДР-лул БакIчиналгу, Аьрасатнал КIулшиву дулаврил министерствалулгу хIарачатрайну жуща бювхъунни машан ласун 2,5 миллион луттирдал. Му бакъассагу, жуща бювхъунни ттинин цалагу машан лавсун къабивкIсса, цIуллу-сагъшиврул ссуссукьусса оьрчIансса хасъсса луттирдугу машан ласун. Ва даву даннингу школарттал библиотекартуралгу, жул пишакартуралгу дурссар хъуннасса даву – дурссар чIярусса шиннардил мутталий къадурсса луттирдал инвентаризация. Му даву дурну махъри жуща чув циксса луттирду аьркинну буссарив кIул бан, хъирив лаян бювхъуссагу», -тIий, буслай бур министр Уммупазил Оьмарова.
Ларгмур шинал кунма, гьашину лавсун бувкIми луттирдайгу бищунтIиссар цал бакъа ишла бан къабюхъайсса голограммагу дусса номер ва гьарца лу ласунтIиссар компьютерданийсса аьмсса сияхIравун. Вагу луттирду базаллавун бахлай къабуккан дуллалисса хъуннасса давур.