ЦIумур школа къабувну, бухмур лакьин къабитантIиссар

Цаппара гьантрал хьхьичI Дагъусттаннал социал сетирдаву, Щамхаллайсса 49-мур школа лакьлай буну нину-ппу, педагогтал ва гикку ялапар хъанахъисса халкь ва иширай цивппа хъинну къарязишиву баян буллалисса роликру ккаккан буллай бия. Школа лакьин багьлагьисса хIукму бувну бур судрал июнь зуруйва.

Залму АьбдурахIманова
Поселок Кировский райондалийн дагьайхьувкун, агьалинал тIимунихгу вичIи дишин, масъалалулгу хъирив уккан ши­ккун увкIун ур райондалул бакIчи СалихI Сагидов. Ванащал бувкIун бия ДР-лул кIулшиву дулаврил министрнал цалчинма хъиривчунал буржру биттур буллалисса Ширали Аьлиев­гу, МахIачкъалаллал мэрнал хъиривчу Багьауттин Мухтаровгу, МахIачкъалаллал кIулшиву дулаврил управлениялул хъунама Вадим Дибиевгу. Вайннащал мукунма бувкIун бия лакьин ккаккан бувсса школалул тагьар ххал дан­сса Роспотребнадзорданул ва МЧС-рал зузалтгу.

СалихI Сагидовлул хьунабакьаврий кIицI бунни цувагу рязину акъашиву поселокрай ца бакъа-бакъасса школа лакьлакьаврия ва МахIачкъалаллал мэр Салман Дадаевлулгу амру бувшиву, ччясса мутталий масъалалул хъирив бувккун, школа буруччинмур бан.
ЧIалачIиссаксса, судрал школа лакьинсса хIукму бувну бур шагьрулул ва райондалул каялувчитурангу хавар къабувнува. СалихI Сагидовлул хьунабакьаврий халкьуннахь бувсунни Щамхаллай 7 аьрщарал касак ккаккан бувну бушиву кIулшиву дулаврил идарартту бан.

-ЦIана жу зий буру МахIач­къалаллал администрациялущал Щамхаллай уттизаманнул школа буллай байбишинсса давур­ттал ялув. ЦIусса школа баннин зун аьркинссар бухмур школагу. Жу оьрчIру тили-хъили буллан, шагьрулул цайми школарттайх ми ххилай, нину-ппу инжит буллан къабитанну,-увкунни агьалинал хьхьичI райондалул бакIчинал.
ЦIана хасъсса пишакартурая сакин бувсса комиссия зий бур бухмур школа лакьин къабитаврил ялув.