Москавуллал мэрнал барчаллагьран лайкь хьунни

Миясат Къушиева

Хьхьу- кьини къакуну, цала оьрмулунгу, цIуллу-сагъшиврунгу нигьачIисса шартIирдай коронавирусрал инфекциялущал талай, личIи- личIисса наградарттан лайкь хьусса хIакинтураву чансса бакъар жула лакгу.

Миннавух бур ЧIурттащатусса Эльдардул ва Гъумучасса Дездемонал душ Миясат Къушиевагу. Москавуллал мэр Сергей Собяниннул чулуха ванийн бувкIунни Барчаллагьрал чагъар.


Дуккавриву, давриву итххявхсса Миясатлул пандемия дайдирхьусса чIумалгу ккаккан бунни цила бюхъу-бажар ва пишакаршиврул даража.
2003-ку шинал Миясатлул къуртал бувну бур Гъумучиял чIяру профиллу дусса лицей мусил медальданий. Мура шинал бувххун бур Дагъусттаннал медициналул академиялул «лечебное дело» факультетрайн. ХьхьичIунну дуклакаврицIун, Миясат хъуннасса гьурттушинна дуллай бивкIун бур жяматийсса давурттаву. Ва бия курсрал староста, республикалул жагьилтурал комитетрал член.

Вузгу ЯтIул дипломрай къуртал бувну, 2009-2011 шиннардий був­ккуну бур терапиялул ординатура Москавлив, Н.И.Пироговлул цIанийсса медициналул университетраву. Мунияр махъ, 2017- ку шинайн бияннин, зий бивкIун бур Пульмонологиялул НИИ- лул клиникалул лабораториялуву (ФМБА).


Коронавирусрал пандемиялул чIумал, Мос­кавуллал ЦIуллу-сагъшиву дуруччаврил департаментрал личIину захIмат ба­къами къашайшалтран онлайн – консультациярду даву мурадрай, Телемедициналул центр зузи дайхту, Миясат бивтссар коронавирусрал къашавайминнащал зунсса хъунмур хIакинну.


2011-ку шиная байбивхьуну, Москавуллал университет­рал ва ИБХФ-рал (Биохимиялул физикалул институт) аьлим­туращал цачIу, Миясат зий бур элмий­сса давурттахагу. АцIнияхъайсса шинну дур ванил Москавуллал клиникалий терапевтну зий. КуртIну лавхьхьуну бур пульмонологнал ва ультразвукрал диагностика дайсса хIакиннал пиша. Цилва пишалул даража хъиннува гьаз баву мурадрай, Миясат гьуртту шай Дунияллул халкьуннал дянив­сса элмий­сса конференцияр­ттай. Ультразвукрал диагностикалуву ванил ишла дуллай бур цIу-цIусса кьяйдарду.

Коронавирусрал пандемиялул чIумал Москавуллал ЦIуллу-сагъшиву дуруччаврил департаментрал, личIину захIмат бакъами къашайшалтран онлайн – консультациярду даву мурадрай, Телемедициналул центр зузи дайхту, Миясат бивтссар коронавирусрал къашавайминнащал зунсса хъунмур хIакинну.
— Азар куклуну ягу дянивну дирсса инсантал стационарданий кьамул къабарчагу, ми чара бакъа хIакиннал аякьалулу, хIакиннащал дахIаву дуну бикIан аьркинну бия.

Жу миннащал онлайн кьяйдалий, цIухху-бусу буллай, консультациярду дуллай, зий бивкIру. Телемедициналул центр цила чIумал тIивтIунни ва муния хъунмасса мюнпат хьунни. Карантиндалул чIумал центрданул хIакинтураща, поликлиникардайминнайн хъиннува гуж багьлай буну, чIявусса къашайшалт цайнма ласун бювхъунни.

Хьхьу-кьини къакуну зий, 70- ннийн дирсса консультациярду гьантлун дуллай бивкIссару жу. Шанма зурул мутталий центр­данул дистанционнайну хъин бувссар covid-19 диагноз ду­сса 100 азарунния ливчусса инсантал.
Телемедициналул цIуллу-сагъшиву дуруччаврил аралуву лайкьсса кIану бугьаншиву мяйжан хьунни ва ппурттуву,- тIий бур Миясат.

Ва давривугу Миясатлуща ккаккан бан бювхъунни цуппа лавайсса даражалул пишакар бушиву. Даврил ур­такьтурачIа Миясатлул хIурмат хъунма­сса бур. ЦIими бусса, дакI хъинсса буну тIий, ххирар цила аякьалийсса къашайшалтрангу. Букъавсун къабучIир, Миясатлул нину Дездемонагу Лакрал райондалий ххуйну кIулсса, ххаллилсса хIакин бушиву. Ва бу­ссия Лакрал райондалул азарханалул, мукунма анаварсса кумаграл хъунмур хIакинну. ЦIанасса чIумалгу райондалул анаварсса кумаграл хIакинну зий буссар.