Августрал 4-нний «Дагестанская правда» кказитрал редакциялий ххал бивгьунни къун буккай кIанттурдал тагьарданул ва миккусса захIматшивурттал хIакъиравусса масъалартту. Журналистътуращал хьунабакьин бувкIунни ДР-лул Минимуществалул, Минсельхозпродрал, Минприродалул ва экологиялул, Архитектуралул ва градостроительствалул комитетрал вакилтал.

ДР-лул аьрщарал ва хъус-хъиншивурттал арардал министр АгъарахIим КьагьирхIажиевлул тIимунийну, чIявуну къун буклай бур вахIшинал зумуну. Аьрщи цинна лархьхьусса категориялийн дуцайсса чIумал захIматшиву хъанай дур ишбажаранчитурал къун буккаврил хIакъираву заявкартту дулайни документру тIайлану дузал къабаву. Мунийн бувну, ДР-лул Минимуществалул зузалт­рал ишбажаранчитуращал дай­сса дур за бувчIин буллали­сса маслихIатрал давуртту.
ДР-лул шяраваллил хозяйствалул ва бакIлахъиялул министр Абзагьир ХIусайновлул бувсунни аьрщарал рекультивация даврил ва шяраваллил хозяйствалул хъу-лухччиния къун буклан къадагъа душиврул хIакъираву.

ДР-лул тIабиаьтрал ва экологиялул министрнал хъиривчу Заур Римихановлул бувсмунийну ва идаралул зузалтрал таман­сса давуртту дуллай бусса бур карьердал давурттал ялув бацIаву даврий. ХIакьинусса кьини республикалий циняв къун бу­ккай кIанттурду сияхIрайн лавсун бусса бур ва микку закондалий бакъа, яни хасъсса документ бакъа, къун буккан ихтияр дуллай бакъар. Мяйжанссар, увкунни мунал, хьхьунил чIумал къун бацлацисса ишру уттигу шайссар. Миннул хъирив лавну, аьчIа дишайссар къун бацлациминнай.
Пресс-конференциялий бувсунни мукунма му аралуву властьрал органнал дуллалисса давурттаягу, хьунадакьлакьи­сса захIматшивурттаягу.