Август зурул 16-нний Буйнакскаллал лахъазанттуй хьунни ялун нанисса никирал цIуллу-сагъшиву дуруччаву ва жагьилтураву спортрахсса шавкь рутаву мурадрайсса спортрал фестиваль. Ванил сакиншинначигу ия Дагъусттаннал панкратиондалул цачIун дур командалул хъунама тренер, МахIачкъалаллал 1-мур спортрал школалул директорнал хъиривчу Аьвдулкарин Айгунов.
Имара Саидова
[dropcap]Ф[/dropcap]естивальданийсса жагьилтурал дянивсса бяст-ччаллу хьунни пут личаврил, гьаз даврил, 1000 метралийх лечаврил, тIанкI учаврил, канат кIункIу даврил ва турникрайн гьаз шаврил гьунарду ккаккан бавриву.
Соревнованиярттайн бувкIсса бусравсса хъамаллуравух бия лачIун уккаврил тIуркIурдал Олимпий чемпион Сайпуллагь Абсаидов, лачIун уккаврил спортрал дунияллул чемпион МахIаммадхан ХIамзатханов, ушу-саньдалул чемпион Мурад Ахадов, лачIун уккаврил дунияллул чемпион МахIаммад Жабраилов, дунияллул ММА-лул спортрал чемпион Мурад Аьбдуллаев, грэпплинграл дунияллул чемпион Асхабаьли Халидов, лачIун уккаврил личIи-личIисса журардал цимилагу Аьрасатнал чемпион хьусса ХIайбуллагь Арбулиев, каруннай бияврил дунияллул чемпион Мартин Ссапарбеков.
Ва кьини мукунма, жагьилтурал чIарав бацIан, фестивальданул сий гьаз дан бувкIун бия республикалул спортрал школардал каялувчитал, тренертал ва цаймигу цIанихсса спортсментал.
ОьрчIал командарттава хьхьичIунсса кIану бувгьунни «Лидер» тIисса спортрал школалул чIава жагьилтурал.
Хъуниминнал дянив канат кIункIу давриву цалчинмур кIану бувгьунни МахIаммадхан ХIамзатхановлул (Волк-хан) командалул. Пут личавриву цалчинсса кIану бувгьунни Тагьир Аьлиевлул, пут гьаз давриву — Шамил Таймасхановлул.
[dropcap]Л[/dropcap]ечавриву, тIанкI учавриву ва турникрайн гьаз шаврил бяст-ччаллаву цалчинсса кIантту бувгьунни «Лидер» спортклубрал спортсментурал.
Шиккува кIицI лаган, фестивальданул сиптачи Аьвдулкарин Айгуновлул каялувшиндаралу уттинингу цикссагу спортрал соревнованияртту хьуссар жулла республикалий.
Ва ххуллухсса бяст-ччаллу лавайсса даражалий шаврин кумаг баврихлу Аьвдулкарин Айгунов хъунмасса барчаллагь баян буллай ур МахIачкъала шагьрулул администрациялийн, хаснува мэрнал кумагчи МахIаммад ХIамматаевлуйн.
