Чапалсса щин сававну

Августрал 10-нний ДР-лул ХIукуматрал Председательнал цалчинма хъиривчу Анатолий Карибовлул дунни ДР-лул ХIукуматрал Санитар-эпидемиологиялул комиссиялул батIаву. Ва ххуллух батIаву дунни Дарбантуллал райондалийсса КIачIухуллал (Геджух) шяраву, хIачIайсса щинал 49 инсан инжит увну ушиврул хIакъираву.


БатIаврий гьуртту хьунни ДР-лул цIуллушиву дуруччаврил министр Жамалуттин ХIажиибрагьимов, ДР-лул строительствалул ва ЖКХ-лул министр Малик Багълиев, ДР-лул Роспотребнадзорданул каялувчи Николай Павлов ва цаймигу.

Жамалуттин ХIажиибрагьи­мов­лул бусаврийну, къашавай хьуну ур 49 инсан, миннавату — 39 оьрчI-бакI. Азарханалийн иян увну ур 7 инсан. ЛивчIми хъин хъанай бусса бур шаппа.
Николай Павловлул тIи­мунийну, аьркинну бур щина­ххуллурду марцI буккан буван ва хлоркалий щин марцI дуллан.

ЦIанасса ппурттуву Роспотребнадзорданул зузалт зий бур тикку.
Анатолий Карибовлул ГО ва ЧС-рал министрнайн тапшур бунни райондалул администрациялун кумаг буван хIачIайсса щинал щаллу буван кIа шяраваллил агьлу. Мунал мукунма бувсунни му масъала ДР-лул хIукуматрал итталу бушиву ва тикку дуллансса давурттал план цIакь дурну душиву.