Августрал 7-нний Каспий хьхьирил зуманив тIиртIунни сайки нюжмардий лахъи лагантIисса
Фольклорданул ва аслийсса культуралул дунияллул халкьуннал дянивсса «Горцы» фестиваль
Бадрижамал Аьлиева
[dropcap]Ф[/dropcap]естиваль хъанахъиссар «Культура» тIисса Национал проектрал, «Творческие люди» тIисса региондалул проектрал лагрулий, Республикалул Халкьуннал творчествалул къатлул сакиншиндарайну.
Вай гьантрай жулла республикалийн хъамалу бувкIссар Аьрасатнал личIи-личIисса регионнаясса творчествалул коллективру, цалла-цалла аьдатру, культура ккаккан дуван.
Амма ва ххуллухмур фестиваль дуллалиссар тамашачитал бакъанува, махъсса зурдардийсса эпидемиологиялул къулай дакъасса тагьар сававну. Мура сававрайн бувну, Азирбижаннал, Ираннал, Индиянал, Италиянал, Мексиканал, Сербиянал ва Словакиянал творчествалул коллективирттал кIантту-кIанттурдаява, онлайн-режимрай, фестивальданул лагрулий ккаккан бувссар цалва музыкалул номерду.
«Горцы» фестиваль тIиртIунни «Ттул Аьрасат – ттул Дагъусттан» цIанилусса гала-концертрайну.
Байран дайдихьлахьисса ихтилат бунни ДР-лул ХIукуматрал Председательнал цалчинма хъиривчу Анатолий Карибовлул. Мунал бувккунни фестивальданул гьурттучитал барча буллалисса ДР-лул ХIукуматрал Председатель Артем Здуновлул цIаниясса махъру. ЮНЕСКО-лул эгидалулу цимигу шинай дуллалисса фестивальданул агьамшивугу кIицI ларгун, муний гьуртту хъанахъиминнан тIайлабацIу чIа увкунни. Фестиваль сакин дурми ва мунивух гьуртту хъанахъими барча буллалисса телеграммартту дия ЮНЕСКО-лул гендиректор Одрэ Азулел, ЮНЕСКО-лул иширтталсса бувайсса Аьрасатнал Федерациялул Комиссиялул жаваблувсса секретарь Григорий Орджоникидзел, АьФ-лул культуралул министр Ольга Любимовал, Аьрасатнал Президентнал маслихIатчи Владимир Толстойл цIаниятусса.
[dropcap]Ф[/dropcap]естивальданул цалчинсса кьини хьунни «Дагестан мастеровой» выставка. Муний ккаккиялун дирхьуну дия халкьуннал аслийсса пишардал усттартурал дурмур. Цалла ляличIисса усттаршиву ккаккан дурна жулла республикалиясса 11 усттарнал, Калужскаллал, Самарскаллал, Аьшттарханнал областирдаясса ва цаймигу кIанттурдаясса 15 усттарнал.
Фестивальданул кIилчинсса кьини хьунни вания тиннай, фестиваль лакьинцIа, гьарца кьини хъанантIисса «Аьрасатнал аьдатру» тIисса концерт – фестивальданул открыткарду.
Хьхьирил зуманивсса сахIналий вай кьинирдай, ярг-яргсса къавтIавурттугу ккаккан дурну, хъин-хъинсса балайрду увкуна Марий Эл, Ухссавнил АьсатIин-Аланиянал, Чачаннал, Ингушнал республикарттаясса, Аьшттарханнал, Ростовуллал, Ярославуллал областирдаясса, Пермскаллал улклуясса ва жулла республикалул творчествалул коллективирдал.
Августрал 10-нний, шамилчинсса кьини, хьунни «Фестивальданул марафон» ва «Буттахъал ирс» цIардалусса кIира концерт. Гьарцагу номерданул хьхьичI концерт дачин дурми буслай бия сахIналийн буккан нанисса коллективрая, миллатирттая, халкьуннал багьу-бизулия, культуралия.
Мукунна хьунни фестивальданул давривух гьуртту хьусса халкьуннал канил пишардал усттартуран Дагъусттан Республикалул Культуралул министерствалул чулухасса дипломру буллалисса шадлугъ ва чIярусса цаймигу давуртту.
Фестивальданул лагрулий хъанахъисса шадлугъру ккаккан бюхъантIиссар Ютубрай РДНТ-лул каналданий ва Инстаграмрай, мукунна «Дагъусттан» ГТРК-лий ва РГВК-лий.
