«Мы вместе» тIисса акциялувух чялишсса гьурттушинна дурсса волонтертуран цIа куну, Аьрасатнал Президентнал ккаккан дурну дия «За бескорыстный вклад» тIисса медаллу.
Медаллан лайкь хьунни коронавирусрал пандемия сававну захIматсса тагьарданухун багьну бивкIминнан кумаг буллай бивкIсса волонтертал.
Зулайхат Тахакьаева
[dropcap]М[/dropcap]иннавасса ца ур Хъусращиял шяраватусса АьбдурахIманов Жавраил ТIалхIатлул арс.
2017-ку шинал ванал къуртал бувну бур Москавуллал автомобил-ххуллурдал университет. Ххув хьуну ур «Я профессионал» тIисса кадрардал конкурсрай.
[dropcap]А[/dropcap]ьрасатнал Президентнал чулухасса медаль ва грамота дуллай, Владимир Васильевлул барча дунни ихIсандалул фонд
«Чистое сердце»
ЦIанасса чIумал ва ур «Чистое сердце» фондрал волонтёртурал ккурандалул каялувчину.
Эпидемия сававну, республикалий захIматсса тагьар хIасул хьусса цалчинсса гьантрайва МахIачкъала шагьрулул мэр Салман Дадаевлул ва шагьрулул Спортрал, туризмалул ва жагьилтурал иширттал комитетрал хъунама Марат Ибрагьимовлул коронавирусрал инфекциялийн къарши бацIансса шагьрулул оператив штаб сакин бансса хIукму бувайхту, цалчин му давривух чялишну хIала увххун ур Жавраил.
— Ттун бувчIлай бия ва ишираву чIивисса кумаггума бучIи лякъинтIишиву. Халкь захIматну ливчIсса чIумал шава щяикIан ттуща хъанай бакъая. ИчIуваминналгу ттул сипта хъин чулий ккарккуна, амма дюъ дирхьуна бюхъайссаксса мугъаятну зун, оператив штабралгу жул ялув бацIаву кьянкьасса дия. ТIалав дуллай бия маскарду ва катIри лаххаву, мудан жущалла дикIан багьлай бия антисептикру, личIлулшиву хьхьара дансса чара бакъая.
Цалчинсса гьантрайва МахIачкъалаллал волонтёртурал корпусращал жу байбивхьуру агьалинан баян буллай ялун нанисса вирусрал нигьачIаврия ва шаппа-шаппа щябикIан багьлай бушиврия. Ялтту буклай бивкIру жямат батIайсса кIанттурдал, лачIун дуллай бивкIру вирусрая бусласисса баннерду, дачIлай бивкIру маскарду. Ялу-ялун захIмат хъанахъисса тагьарданул агьалинавун авара, ццах бутлай бия. Амма жу ляхълай буссияв му тагьардануву бюхъайнал чIарав бацIансса чаранну.
«Мы вместе» тIисса проектрал лагрулий Дагъусттаннал Жагьилтурал иширттал министерствалущал ва «Чистое сердце» фондращал цачIуну жу гьарца кьини буссияв «горячая линиялийнсса» оьвчавуртту кьамул дуллай, мюхтажсса кулпатирттан дукиялул пакетру биян буллай. Жул зузи кьини, кIюрххил 8 ссятраву дайдирхьуну, хьхьудяризал къуртал шайва – оьвчавурттал чIярушиврул.
Гьарца кьини жу кумаг биян байссия кIиттуршва кулпатран. Арулттуршва кулпатран кумагру биян бувссагума шайва кьинирду.
Вай давурттахлу Жавраил АьбдурахIманов лайкь хьуну ур Аьрасатнал ПаччахIлугърал Думалул ялув бацIаврил ва регламентрал комитетрал хъунаманал цалчинма хъиривчу Ризван Кьурбановлул цIаниясса Барчаллагьрал чагъарданунгу.
Медаль ва Барчаллагьрал чагъар барча тIий, жувагу учинну Жавраиллухь барчаллагь, кьини дурксса чIумал, чулий къаавцIуну, халкьуннан цащава шайсса кумаг буллай ивкIшиврухлу.
