[dropcap]М[/dropcap]ахIачкъалалив, Дусшиврул къатлуву, хьунни цIуну бувчIусса Жяматийсса палаталул члентурал батIаву. Му дачин дурну ия Жяматийсса палаталул председатель Аьбдулмуъмин Ибрагьимов.
Шикку гьаз бувсса агьамсса масъаларттавасса ца бия сентябрь зуруй хьунтIисса бувчIавурттал масъала.
Аьбдулмуъмин Ибрагьимовлул бувсунни бувчIавурттай Жяматийсса палаталул чулухасса вакилталгу ялувбацIултну бикIантIишиву.
Му батIаврий гьурттушинна дан увкIсса Дагъусттаннал БакIчинал ва ХIукуматрал Администрациялул информациялул политикалул управлениялул хъунама Зубайру Зубайруевлул гьаз бунни информациялул мюхчаншиврул масъала, бувсунни администрация хIадуршиву Жяматийсса палаталул даврин кумаг буллан, чIарав бацIлан.
Цала ихтилатраву ванал кIицI лавгунни дунияллул практикалул чIалачIи буллалишиву, паччахIлугърал ци хIарачат булларчагу халкьуннал ахIвал-хIал ххуй бан, жяматрал гьурттушинна дакъахьурча, хIарачат дузрайн къабуккайшиву, мунияту жяматрал гьаз буллалисса масъалартту властьрал хьхьичI ххуттайн ласлан аьркиншиву.
Микку мукунма гьаз бунни зунттал районнай ххуллурду баврил, Жяматийсса палаталучIа жагьилтурал совет сакин баврил ва цаймигу масъалартту.
Андриана Аьбдуллаева
