Марафондалул бачIи манзил

Августрал 2-нний жулла республикалий хьунни «Забег РФ» тIисса щалвагу Аьрасатнал полумарафон. Му спортрал мероприятие дайссар гьар шинах Аьрасатнал 85 шагьрулий, миннувух Каспийскалий ва МахIачкъалалив гьашину мукьулчинни дурсса. Жулла республикалий му дайссар ДР-лул Спортрал ва физкультуралул министерствалул.

ХI. Аьдилов
Лечаву дайдирхьунни Каспийскалий Лениннул майдандалия. Муний гьуртту хьунни 70 инсан, лечин хьхьичI миннал дунни коронавирусрайнсса тестругу.
Марафондалий гьуртту хьуминнахь республикалул каялувчинал чулуха аьла-ссаламгу бувну, ххувшавуртту чIа кунни цалчинма вице-премьер Анатолий Карибовлул.

Аьмну гьурттучитурал бивтунни 21 километралул манзил. Каспийскаллал цаппара кучардавухгу бувккун, марафончитал бувкIунни МахIачкъалаллал Хъунмайданнив. Микку миннан цинявннан дуллунни дакIний личIансса медаллу. 18-34 шиннавусса жагьилтураву цалчинмур кIану бувгьунни Андрей Федоричевлул. Мунаяр шанна минутIрал махъ увкIунни кIилчинмур кIану бувгьусса МахIаммад АьлихIажиев. Шамилчинмур завалун лайкь хьунни МахIаммад Агъакишиев.
Мува оьрмулул душвараву цалчин бувкIунни Раисат Чартаева, кIилчинмур кIану бувгьунни Амина Хидарбековал, шамилчинмур – Аминат МахIаммадовал.

35-40 шиннавусса хъанниву цалчинмур кIану бувгьунни Динара ХIаммадовал, кIилчинмур кIану – Мария АхIмадовал, шамилчинмур – Анна Гребенщиковал. Арамтураву цалчинмур кIану бувгьунни Терлан Амираьлиевлул, кIилчинмур – Алексей Ивановлул, шамилчинмур – Мурад МахIаммадтIагьировлул. Наградартту дуллунни мукунна Камил Давдиевлун (45-54 шиннавуминнаву) ва Евгения Драгунован (55 шин).

Читайте также: