Оьргърал шяраву хьунни Художниктурал биеннале

Лавгми бигьалагай гьантрай цIаларгсса заргалтурал Оьргърал шяраву магьирлугъ ххираминнансса ва ва аралуву зузиминнансса шадлугърал батIаву хьунни. Шикку «Оьргърал къала» тIисса цIанилу тIиртIунни печатьрал графикалул халкьуннал дянивсса кIилчинсса Биеннале. Ваний тамашалун дирхьуну дия Аьра­сатнал, Беларусснал, Украиннал, Болгарнал, Чехиянал, Туркнал, Германнал, Нидерланнал, Мексиканал ва Венесуэллал цIаларгсса художник-графистътурал ва художествалул вузирдаву ккалакки­сса жагьилсса художниктуралгу дирхьусса 200-сса сурат.


З.АьбдурахIманова
Биеннале сакин дурну дия «Де Граф» тIисса творчествалул ккурандалул «Гипотенуза» ва «Зерихгеран» тIисса жяматийсса сакиншиннардищал цачIу.
Хъамал бувкIун бия республикалул чIявусса кIанттурдая. Вайннавух художниктал ба­къасса, бия заргалтал ва искусст­воведталгу. Выставкалул сакиншинначитурал давуртту лархъун дия щарнил зуманив­сса къарал байсса бивкIсса къалалул аьвзалзаманнул чарттал чIирттай.

Графикалул суратругу Оьргърал усттартурал канила дуккайсса накьичирттацIун даркьусса, муххай дишайсса лишанну ишла дурсса дия. Махъру шикку лавхъуна искусствоведениялул доктор Мисрихан Мисрихановлул, искусствовед Влада Бесараблул, художник Александр Сергеевлул ва цайминналгу. ДР-лул культуралул министр Зарема Буттаевал чулухасса барча буллалисса махъру бувккуна Дахадаевуллал райондалул бакIчинал хъиривчу АьбдулхIамид Жамаловлул. «Оьргърал къала» нантIиссар августрал ахирданийннин. Ванил кIилчинсса ятапI дантIиссар ссуттил МахIачкъалалив Поэзиялул театрдануву.

Читайте также: